Tashkent tórinde Abaıdyń týǵan kúni toılanyp jatyr

TAShKENT. QazAqparat - Baýyrlas Ózbekstan memleketiniń astanasynda Uly Abaıdyń týǵan kúni tuńǵysh ret keń aýqymda toılanyp jatyr. Aıtýly sharaǵa Shyǵys Qazaqstan óńirinen  oblys ákiminiń orynbasary Ásem Núsipova bastaǵan arnaıy delegatsııa qatysýda,  dep habarlaıdy QazAqparat tilshisi.

Ózbek elinde Abaıdy ulyqtaý, onyń ádebı murasyn jurtqa nasıhattaý jumystary naýryz aıynda bastalyp ketken eken. Oǵan qos memleket basshylarynyń ózara yntymaqtastyqty damytý jónindegi kelisimderi serpin berse kerek. Osy kelisim aıasynda Ózbekstan Prezıdenti Shavkat Mırzıeev arnaıy Qaýly qabyldaǵan. Sol qaýly negizinde bıyl Ózbekstan boıynsha Abaı jyly jarııalanypty.

Tashkent tórindegi saltanatty shara Qazaqstannyń Ózbekstandaǵy tótenshe jáne ókiletti elshisi Erik Ótembaevtyń, Qazaqstan Jazýshylar odaǵynyń tóraǵasy Ulyqbek Esdáýletovtiń, Ózbekstan Respýblıkasynyń ultaralyq qatynastar jónindegi komıtetiniń tóraǵasy Rýstam Kýrbanovtyń, Shyǵys Qazaqstan oblysy ákiminiń orynbasary Ásem Núsipovanyń qatysýymen ótti.

Uzyndyǵy 3 shaqyrymǵa jeteqabyl Abaı kóshesiniń basynda qasqaıyp Uly Abaıdyń eskertkishi tur. Onyń artynda tóbesine kók kúmbez tóńkerilgen Qazaqstan elshiliginiń eńseli ǵımaraty bar. Tashkenttikter ony Ózbekstandaǵy eń úlken elshilik ǵımarat dep sıpattady bizge. Eskertkish aldyna el tańǵy saǵat 8.00-den jınala bastady. Arasynda qazaqsha qaýqyldasyp jatqan qarttar da jeterlik.

Abaı tulǵasyna táý etýge kelgen qalyń qaýymǵa alǵashqy lebizdi Qazaqstan elshisi bildirdi.

«Bıyl naýryzda qabyldanǵan Ózbekstan Prezıdentiniń Qaýlysynda Abaı shyǵarmashylyǵy Qazaqstanmen qatar ózbek halqynyń da rýhanı damýyna zor yqpal etkeni atap kórsetilgen. Abaı eskertkishiniń aldynda aqynnyń týǵan kúni qarsańynda óleń oqý budan bylaı dástúrge aınalmaq», - dedi Erik Ótembaev.

Altaıdan arnaıy barǵan Shyǵys Qazaqstan delegatsııasy uly aqynnyń Tashkenttegi oqyrmandaryna erekshe syılyq ala barǵan. Ol - «Abaı álemi» serııasymen basylyp jatqan 100 tomdyq toptamanyń alǵashqy bes kitaby. Atalmysh tartýdy belgili ǵalym Arab Espenbetov Ózbekstan jazýshylar odaǵynyń ǵımaratynda ótken konferentsııada tabys etti. Eki sharada da Semeı qalalyq tarıhı-ólketaný mýzeıi men Oblystyq ámbebap kitaphana qyzmetkerleri mazmundy kórme usyndy. Tashkenttiń zııaly qaýymyn ásirese HІH ǵasyrdyń aıaǵy men HH ǵasyrdyń basynda jaryq kórgen sırek kitaptar qyzyqtyrdy. Olardyń arasynda Abaı kóz maıyn taýysyp oqyǵan eski kitaptardy qolǵa alyp, jaqsy yrymǵa balaǵandar da boldy

«Tashkent tórindegi toıǵa Uly Abaıdyń jerles urpaqtary retinde qatysý - biz úshin úlken abyroı. Qazaqtyń bas aqynyn osylaısha ulyqtap jatqan baýyrlas memleketke Búkil Shyǵys Qazaqstan halqynyń atynan alǵys aıtamyn. Uly Abaıdyń murasy ózi týǵan óńirde de keńinen nasıhattalýda. Onyń shyǵarmasy búginde álemniń 28 tiline aýdaryldy. Qazaqstan Prezıdenti Nursultan Nazarbaevtyń nusqaýymen qolǵa alynǵan «Rýhanı jańǵyrý» baǵdarlamasy da uly aqynnyń murasyn túgendeýge kóp septigin tıgizýde. Bıylǵy jazda ǵana 2000-nan astam mektep oqýshysy Uly Abaı týǵan Jıdebaı óńirine saıahat jasap, Abaı álemimen tynystap qaıtty. Al Qazaqstan Jazýshylar odaǵynyń tóraǵasy Ulyqbek Esdáýletov  toıǵa óleńnen shashý shashty.

Tashkenttegi qazaq jastary Abaı murasynan kende emes ekendikterin dáleldep, aqyn óleńderin qos tilde jatqa oqysa, semeılik dástúrli ánshi Berik Omarov Tashkent aspanyn Abaı ánderine bóledi.

Elshilik aldyndaǵy shara aqyn eskertkishine gúl shoqtaryn qoıýmen túıindeldi. Al Jazýshylar odaǵynyń ǵımaratyndaǵy konferentsııa áli jalǵasýda.