Tashkent pen Býdapesht ózbek AES-ine salqyndatý júıesin engizý múmkindigin talqylap jatyr

TAShKENT. KAZINFORM – Tashkent qalasynda Ózbekstan men Majarstan arasynda kelissóz júrip jatyr, dep habarlaıdy Kazinform agenttiginiń menshikti tilshisi. 

Oǵan Uzatom agenttiginiń basshylyǵy, Majarstan Syrtqy ister jáne saýda mınıstrliginiń ókilderi, sondaı-aq birneshe kompanııanyń jetkshileri qatysyp jatyr. Kelissózde taraptar AES-ke qajetti qurǵaq salqyndatý júıesin qurastyrý jáne ony Ózbekstanǵa jetkizý máselelerin talqylap jatyr.

- Ózbek tarapy óndiristi el aýmaǵyna ornalastyrýǵa erekshe nazar aýdarady. Atap aıtqanda, erkin ekonomıkalyq aımaqta birlesken kásiporyn qurý múmkindigi zerdelenip jatyr. Bul óz kezeginde Ózbekstannyń atalǵan jobadaǵy úlesin arttyryp, óńirdiń ónerkásiptik damýyna jol ashady, - delingen Uzatom agenttiginiń habarlamasynda.

Sondaı-aq kezdesýde jaýapty organ basshylary kadr daıarlaý máselesine de toqtaldy. Bul rette MVM EGI Zrt. kompanııasynyń ókilderi ózbekstandyq mamandardyń biliktiligin arttyrýǵa kómek kórsetpek.

Eske salaıyq, buǵan deıin Ózbekstan AES-ke qajetti salqyndatý júıesin Majarstannan alatynyn jazyp edik.

Sonymen qatar Ózbekstan bıligi iri AES salý múmkindigin qarastyryp jatyr.

Buǵan qosa, qazirgi ýaqytta resmı Tashkent az qýatty AES salýǵa kiristi. Árqaısysynyń qýaty 55 MVt bolatyn 6 reaktor (jalpy qýaty - 330 MVt) Djızak oblysyndaǵy Týzkan kólinde boı kóteredi. AES-tiń alǵashqy reaktory 2029 jyldyń sońynda iske qosylmaq. Al ol tolyq qýatta 2033 jyldan bastap jumys isteıdi dep josparlanǵan.

Jaqynda «Alter ego» ıýtýb arnasyna suhbat bergen Uzatom agenttiginiń dırektory Azım Ahmedhadjaev AES-tiń quny 2 mlrd dollardan aspaıtynyn aıtty.

Osyǵan saı, Ózbekstan men Reseı AES salý kelisimshartynyń kúshine ený hattamasyna qol qoıdy.

Sondaı-aq AES salý úshin halyqaralyq konsortsıým qurylady.