Tartyl Fest-ten top jarsam, júldemdi páter satyp alýǵa jumsaımyn – Samat Shapıbaı
Olardyń qatarynda Samat Shapıbaı da bar. Byltyr bastalǵan Tartyl Fest baıqaýynyń qatysýshysy osy aqpan aıynyń 18-i kúni elordada ótetin grand-fınalda da óner kórsetedi. Aımaqtan onymen birge birneshe sportshy baq synaıdy.
Samattyń aıtýynsha, qazir oblys ortalyǵynda da, aýdandarda da saıabaqtar men kóshelerde Street Workout alańshalaryna kóz úırengen. Aptanyń árbir kúninde, demalys kúnderi odan da kóp jastar sol alańshalardan tabylady. Ol salaýatty ómir saltyn ustanýdy maqsat etken elimiz úshin is júzindegi úlken nátıje.
«Ol jastar tek qana temirmen shynyǵyp, bosqa ter tógip te júrgen joq. Birinshiden zamandastaryna úlgi bolyp, sportpen aınalysýǵa nasıhat jasap júrse, ekinshiden bási bıik dodalarda aımaqtyń abyroıyn asqaqtatyp keledi», - dedi jas vorkaýtshy.
Osy tusta Prezıdent Qasym-Jomart Toqaevtyń «Ult densaýlyǵyn bekemdeý máselesi de óte ózekti. Barlyq jas sanaty arasynda buqaralyq sport túrlerin nasıhattaı berý kerek», - degen sózi oıǵa oralady. Ol balalar úshin sporttyq ınfraqurylymnyń barynsha qoljetimdi bolýyn qamtamasyz etý kerektigin de meńzegen.
Іle-shala dene shynyqtyrý men buqaralyq sportty damytý jónindegi keshendi jospar ázirlenip, ol Úkimettiń qaýlysymen bekitildi. Alaıda, Samat sekildi jastar osyndaı mańyzdy qujat aıasyndaǵy jumystar óńirlerde kórinis taba bermeıtinine qynjylady.
«Osy sport túrimen 2012 jyldan beri turaqty túrde shuǵyldanyp kelemin. Qazir Jambyl oblysynda 481 bala vorkaýtpen aınalysady. Mektep qabyrǵasynan bastap aınalysqandyqtan, bul sportta mol tájirıbe jınadym. Negizi, kermege tartylýmen 7 jastan bastap jattyǵa bastaıdy. Búginde Áýlıeata óńiri vorkaýt boıynsha el aýmaǵynda ekinshi orynda tur. Bul jaman kórsetkish emes. Desek te, osy kórsetkishterge eshqandaı qoldaýsyz, óz kúshimizben jetip júrmiz dep aıtar edim», - dedi Samat Asqaruly.
Olardyń barlyǵy óz qaltalarynan aqsha shyǵaryp jarystarǵa qatysyp júrgen kórinedi. Tek jospardy oryndaý kerek bolǵan kezde ǵana vorkaýtshylar sport basqarmasyna kerek deıdi sportshy.
Ol Astanada ótetin tartysty básekede top jarý úshin baryn salatynyn da jetkizdi. Eger jeńiske jetip, qarjylaı júlde qanjyǵalap jatsa, baspana satyp alý úshin bastapqy qunyn quıýǵa nıetti. Óıtkeni, vorkaýtshynyń otbasy áli kúnge páter jaldap turady.
Sóz sońynda talaı jarystan oza shaýyp, top jaryp júrgen Samat Asqaruly aldaǵy ýaqytta basqarma tarapynan turaqty qoldaý bolsa degen talap-tilegin jetkizdi.
Bul rette, QazAqparat tilshisi Jambyl oblysy ákimdigine qarasty dene shynyqtyrý jáne sport basqarmasyna da qaıyryldy. Óńirde buqaralyq sportty damytý baǵytynda qandaı jumystar atqarylǵanyn, qandaı qoldaýlar bar ekenin suradyq.
«Strıtvorkaýt sport túrin oblysta damytý maqsatynda 2014 jyldan alańshalar salynyp bastady. 2022 jyldyń ózinde aımaqta 25 strıtvorkaýt alańshasy paıdalanýǵa berilip, óńirdegi strıtvorkaýt alańshalarynyń sany 287-ge jetti. 2023 jyly aýdandyq, qalalyq bıýdjetten jáne demeýshiler esebinen 10 strıtvorkaýt alańshasynyń qurylysy júrgiziledi dep josparlanýda. Byltyr shildede «Mart» saýda oıyn-saýyq ortalyǵynda Qazaqstan Respýblıkasy Prezıdenti janyndaǵy «Dara» daryndylardy qoldaý qory men oblystyq dene shynyqtyrý jáne sport basqarmasynyń uıymdastyrýymen kermege tartylýdan Tartyl Fest sporttyq festıvali ótti. Festıvalge 500-den asa sportshy qatysty», - dedi basqarmanyń buqaralyq sportty damytý bóliminiń basshysy Azamat Dildebaı.
Onyń sózine qaraǵanda, sol sekildi 2016 jyldan bastap oblys kóleminde «Kóshe oıyndary» festıvali uıymdastyrylýda. Festıval baǵdarlamasynda strıtvorkaýt, armrestlıng, mas-restlıng, armlıftıng, halyq jımi, gir sporty, arqan tartý jáne strıtbol sport túrleri qarastyrylǵan. Festıvaldiń barlyq kezeńderine jyl saıyn 10 myńnan astam adam qamtylýda.
«Bıyl da oblysta eki aýqymdy týrır uıymdastyrylady. Al aldaǵy aqpanda ótetin jarysqa 10 sportshy joldama alǵan. Olardyń ishinde otbasylyq jaǵdaıyna baılanysty ekeýi barmaıtyn boldy. Negizinde elordadaǵy fınal bıyl qańtar aıynda ótýi kerek bolatyn. Biz aldyn ala bıletterin alyp qoıǵanbyz. Bul jarysta balalardyń jatatyn orny, sol jaqtaǵy tamaǵyna «Dara» daryndylardy qoldaý qory qoldaý bildirip otyr. Al bıletine bizdiń basqarma jaýapty. Biraq jarys merzimi aqpan aıyna aýystyrylǵandyqtan, bıletterdi qaıtadan ótkizýge týra keldi. Endi jarys kúni jaqyndaǵanda qaıtadan bıletterin alamyz. Taǵy da jarys merzimi aýystyrylýy nemese otbasylyq jaǵdaılaryna baılanysty barmaı qalatyndar bolýy múmkin, sol sebepti dál qazir bılet almaı otyrmyz», - dep túsindirdi dene shynyqtyrý jáne sport basqarmasynyń ókili.
Eki taraptyń pikiri osylaısha ushtasa qoımady. Vorkaýtshy jastar qoldaýdyń joqtyǵyna qapaly, al basqarma jyl saıyn qoldaýdan qoly tımeı otyrǵandaryn alǵa tartýda.
Aıta keteıik, vorkaýttan alǵashqy álem birinshiligi 2011 jyly 27-28 tamyz aralyǵynda Rıgada (Latvııa) ótken. Jarys qorytyndysy boıynsha ýkraındyq Evgenıı Kozyr birinshi orynnan kórinip, vorkaýt tarıhyndaǵy eń alǵashqy jeńimpaz atanǵan. Qazaqstandyqtardyń arasynda vorkaýt qozǵalysy tek 2009 jyly ǵana keńinen taraı bastady. Qazir elimizde atalǵan sport túrinen dúbirli jarystar uıymdastyrylyp keledi.
