Tartyl Fest: Óskemendik oqýshy týrnıkke tartylýdan álem chempıonatyna barýdy armandaıdy
Egor Nogınniń jasy 17-de. Óskemen qalasyndaǵy №39 orta mektepte 11-synypta oqıdy. Sportty bala kezinen janyna serik etip keledi.
«Atam shańǵy jarysynan sport sheberi, meni osy sport túrine baýlydy. Shańǵyshy retindegi kásipqoı mansabym nátıjeli bolmaǵan soń qysqy polıatlonǵa aýystym. Onda ózimdi jaqsy kórsete bastadym. Prezıdenttik kópsaıys boıynsha sport sheberi atandym. Al týrnıkke tartylǵan ózime unaıdy. Aýlada dostarymmen birge ermek retinde tartylyp júrdik. Ýaqyt ótken saıyn kóbirek jáne taza tartylatyn boldym. Ázirge jeke rekordym – 33», - deıdi Egor.
Tartyl Fest jobasy týraly Instagram jelisindegi jarnamadan bilipti. Esh oılanbastan qatysamyn dep sheshken. Sebebi ózin synap kórgisi kelgen.
Kámelettik jasqa deıingi 55-70 keli aralyǵyndaǵy salmaqta baq synadym. Qarsylastar osal bolǵan joq. Áıteýir 28 ret tartylyp, jeńimpaz boldym. Ekinshi oryn ıelengen Aleksandr esimdi jigit - 27 ret, al úshinshi oryn alǵan Baǵlan degen qarsylasym 25 ret tartyldy.
Medal men 200 myń teńge aldym. Endi Astanaǵa barýǵa daıyndalyp jatyrmyn. Negizinen bul jarysqa aqsha úshin emes, aldaǵy álem chempıonatynda el namysyn qorǵaý úshin qatystym», - deıdi jas sportshy.
Álem chempıonatyna qatysý – Egordyń burynnan kele jatqan armany. Sol qalaýyna jetý úshin esh aıanyp qalmaıdy.
«Uıymdastyrýshylar Óskemendegi jarysqa kásibı turǵydan qarap, óte joǵary deńgeıde ótkizdi. Buǵan óz basym kýámin. Astanadaǵy týrnır de sondaı deńdeıden asyp túspese kem bolmaıtynyna senimdimin. Mundaı jarystar jıi ótkizilip tursa deımin. Sebebi sol arqyly adamdardy salaýatty ómir saltyn ustanýǵa shaqyryp, sportqa tartýǵa bolady. Talaı dosym «Tartyl Fest» festıvaliniń 2-shi maýsymyna daıyndalyp jatyr. Sondyqtan bul joba osymen úzilip qalmaıdy degen senimdemin, - deıdi Egor Nogın.
Eske salsaq, Tartyl Fest týrnıkke tartylýdan óńirlik jarys Óskemende 30 tamyz kúni ótken edi.
Óskemen qalasynyń ákimi de týrnıkke tartylǵan bolatyn.
18 aqpanda Astanada ótetin grand-fınalǵa óńirlik irikteý jarystarynda úzdik nátıje kórsetken 170 sportshy qatysady. Qatysýshylardyń jasy – 14-51 jas aralyǵynda. Ótken jyly týrnıkke tartylýdan jarys Qazaqstannyń 20 qalasynda ótken. Onda 7 myńnan astam qazaqstandyq toǵyz salmaq dárejesinde saıysqa tústi. Tartylý sany boıynsha rekord 33 jastaǵy tarazdyq Evgenııge tıesili – ol 50 ret tartylǵan.
Foto: Egor Nogınniń jeke muraǵatynan
