«Tartyl fest» Qyzylordada: 75 jastaǵy qarııa týrnıkke tartyldy
Atalǵan sharany QR Prezıdenti janyndaǵy «Dara» daryndylardy qoldaý qory uıymdastyryp otyr.
Qyzylorda qalasynda ótip jatqan festıvalde 307 adam baq synaýǵa bel býdy.
Sharanyń ashylý saltanatynda oblys ákiminiń orynbasary Nurymbet Saqtaǵanov buqaralyq sıpat alǵan saıystyń joǵary deńgeıde ótetinine senim bildirdi.
«Talaı talanttarǵa jol ashqan Syr óńirinde sergektikti serik etken jastar az emes. Olardyń arasynda búgingi festıvalde joǵary kórsetkishke qol jetkizýge múmkindigi bar azamattar jeterlik. Sondyqtan olarǵa zor senim artamyz. Búgingi báseke tartysty ótedi degen senimdemin», - dedi oblys ákiminiń orynbasary.
«Dara» daryndylardy qoldaý qorynyń basshysy Nurlan Qoıanbaev ziltemirde tartylatyn jastardyń jyl sanap kóbeıip kele jatqanyn tilge tıek etti. Festıval aldaǵy ýaqytta budan da joǵary deńgeıde ótetinine senim bildirdi.
«Árıne, alǵashqyda bul básekege qatysýshylar sany qalaı bolar degen oı kókeıimizde turdy. Degenmen bastalǵannan keıin oǵan qyzyǵýshylyq bildirgen azamattardyń sany kóbeıgeni baıqaldy. Qazir festıval ótken árbir qalada týrnıkke tartylýǵa nıet bildirgen turǵyndardyń sany arta túskenin baıqadyq», - dedi ol.
Saıys barysynda Qyzylorda qalasynyń 75 jastaǵy turǵyny Aleksandr Kım eń egde qatysýshy ataldy. Ol týrnıkke 15 ret tartyldy.
«Men kóp jyldan beri týrnıkke tartylamyn. Qazir de sol ádetimnen jańylǵan joqpyn. Búgingi saıysqa jeńemin dep kelmegenimdi aıtamyn. Dese de jastarǵa úlgi kórsetýge tyrystym», - dedi qarııa.
Sondaı-aq eń jas qatysýshy retinde sanalǵan 6 jastaǵy Jandáýlet Baǵdatuly týrnıkke 15 márte tartyldy.
«Balam saıys ótetinin estigende oǵan daıyndala bastady. Sol maqsatta oǵan týrnık satyp alyp berdim. Búgin ózin jaqsy kórsetti dep sanaımyn», - dedi onyń ákesi Baǵdat Shákirov.
Qazirge deıin Qyzylordada saıyskerler rekordtyq kórsetkishti jańartýǵa jaqyn tur - týrnıkke 39-40 márte tartylǵan jastar bar.
