Tartyl Fest fınalısi: Qazaqstanda sporttyń damı túsýine úles qosqym keledi
- Aleksandr, ótken jyldyń tamyz aıynda «Tartyl Fest» festıvaliniń Oralda ótkeni belgili. Onda 375 qatysýshy baq synap, sonyń ishinde óziń de boldyń. Talpynysyń qur ketpeı, 18 jasqa deıingiler arasynda 55-70 keli salmaqta jeńimpaz atandyń. Jalpy, bul týrnırge qaıdan tap boldyń?
- Árıne, jarys esimde. Zalda jattyǵý jasap júrip, Instagram jelisinen Qazaqstanda «Tartyl Fest» festıvaliniń ótip jatqanyn kórip qaldym. Sol boıda nege qatyspasqa degen oı kelip, dereý jattyǵýǵa kiristim. Qysqa ýaqyt ishinde kermege 35 ret tartyldym. Festıvaldiń ózinde kórsetkishim sál kemdeý (31) boldy. Sonyń ózinde ózimniń jas ereksheligime jáne salmaǵyma qaraı úzdik shyqtym. Bul meni jigerlendire tústi. Onyń ústine grand-fınalǵa qatysýshylardyń qataryna qosylǵanyma qýanyshtymyn.
- Sportpen qashannan beri shuǵyldanyp kelesiń?
- Ájem Tatıana Aleksandrovnanyń arqasynda kishkentaıymnan bastap aınalysa bastadym. 7-8 synypta oqyp júrgende, sporttyń Street Workout baǵytyna ańsarym aýdy. Sol kezde myqty atlettermen tanystym. Olar meniń kásibı deńgeıge kóterilýime kómektesti. Bir jyldan keıin kúshtik workout-qa, ıaǵnı streetlifting túrine aýystym. Qossyryqta tartylyp, qosymsha salmaqpen kóterilip júrdim. Klassıkalyq streetlifting-ten sport sheberimin. Onlaın ótken qosymsha +16 kelimen tartylýdan álem chempıonymyn. Alǵash ret resmı túrde sport sheberi ataǵyn 15 jasymda aldym. Atap aıtqanda, 2021 jylǵy Eýropa chempıonatynda 16 kelilik gir tasymen 20 ret tartylyp, óz salmaǵym men jasym boıynsha rekord ornattym. Oǵan qosa 2022 jylǵy Qazaqstan birinshiliginiń jeńimpazy atandym. Jarystar onlaın túrde Oralda ótti. Ony Qazaqstan streetlifting federatsııasy uıymdastyrady, onymen Andreı Gennadevıch Makarenko degen adam arnaıy aınalysady.
- Astana tórinde ótetin jarysqa qalaı daıyndalyp jatyrsyń?
- Ázirlik óte jaqsy. Bul rette bapkerim Aleksandr Mıhaılov maǵan kómektesýde. Bári oılastyrylǵan. Qysqa merzimde erekshe tabysqa qol jetkizip, kópshilikti tańdandyramyn dep oılaımyn.
- Óziń oqıtyn shyǵarsyń? Basqa ne qyzyqtyrady? Qandaı komandanyń jankúıerisiń?
-Iá, Oral gýmanıtarlyq-tehnıkalyq kolledjinde dene shynyqtyrý jáne sport muǵalimi mamandyǵyna oqyp júrmin. Bolashaqta bapker bolyp, ózim sııaqty qatarlastarymmen birge balalardy jattyqtyrǵym keledi. Sóıtip ózimniń týǵan Qazaqstanymda sporttyń damı túsýine úlesimdi qossam deımin. Árıne, oǵan deıin sportpen etene aınalysyp, birte-birte bapkerlikke aýysýdy josparlaımyn. Qazirgi kezde basqaǵa ýaqytym da joq. Meniń jumysym da, hobbıim de – street workout. Fýtbol jóninde aıtsam, Ispanııanyń ataqty klýby «Realdyń» (Madrıd) jankúıerimin.
- Aldaǵy kózdegen mejeń qandaı?
- Halyqaralyq dárejedegi sport sheberi ataǵyn resmı túrde eki ret alǵym keledi. Birinshisi – 32 kelilik gir tasymen 16 ret tartylý, ekinshisi – klassıkalyq strıtlıftıngte kerme men qossyryqta jalpy salmaǵy 180 kelini baǵyndyrý.
- Óz otbasyń, týǵan qalań jáne Qazaqstan týraly ne aıtar ediń?
- Otbasym uıymshyl, qalanyń 4-shaǵynaýdanynda turamyz, ákem men anam, sosyn kishkentaı qaryndasym bar. Qazaqstan – óz Otanymyz, sondyqtan onyń kórkeıýine úles qosý – bárimizdiń boryshymyz dep bilemin. Maǵan Oral qalasy tynyshtyǵymen, tazalyǵymen unaıdy. Qaıyrymdy adamdar jeterlik. Keleshekte osy Oralda qalyp, jumys istegim keledi.
- Dostaryń kóp pe, olar da sportpen aınalysa ma?
- Dostarym kóp. Kópshiligi sportpen kásibı túrde aınalysady. Negizinen streetlifting-tiń sheberleri, olardyń arasynda Egor Gorýnov, Ivan Mıhaılov, Danıl Mıhaılov sekildi álem chempıondary da bar. Ómirde árdaıym qasyńnan tabylyp, saǵan súıenish bolatyn, tabys-jeńisińe qýanatyn dostaryńnyń bolǵanyna ne jetsin!
- Astanaǵa alǵash ret barasyń ba?
- Elimiz astanasyna birde-bir ret jolym túspepti. Buıyrsa, birinshi saparym sátti bolyp, kósh basynan kórinemin dep oılaımyn. Óıtkeni sol úshin bar kúsh-jigerimdi jumsamaqpyn. Jeńetinime 100 paıyz senimdimin.
- Elordada qandaı jas ereksheligine qaraı jáne qaı salmaqta synǵa tús esiń?
- Jýyrda 17 jasqa toldym. Sondyqtan ótken jyldaǵydaı 18 jasqa deıingiler arasynda baq synap kóremin. Qazir salmaǵym – 67 keli, sol sebepti 55-70 kelidegiler arasynan úzdik shyqqym keledi. Kermege 45 retten artyq tartylamyn dep oılaımyn.
- Aleksandr, Astanaǵa alǵashqy saparyń sátti bolsyn. Jeńispen qaıtýyńa tilektespin.
Eske sala keteıik, budan buryn «Tartyl Fest» festıvaliniń Oraldaǵy jeńimpaz-júldegerleri anyqtalǵanyn jazǵan bolatynbyz.
«Tartyl Fest» fınaly Astanada 18 aqpanda ótedi.
«Tartyl Fest» týrnıriniń Oraldaǵy jeńimpazy súıgenin jattyǵý kezinde tapqanyn aıtty.
Buǵan deıin «Tartyl Fest» dodasynyń grand-fınalyna qatysatyn oraldyq ıÝrıı Kıchatovpen suhbat usynǵan bolatynbyz.
