Tartyl Fest festıvali búgin Petropavlda ótedi
Sporttyq is-shara Qazaqstan Respýblıkasy Prezıdenti janyndaǵy «Dara» talanttardy qoldaý qorynyń uıymdastyrýymen ótpek.
Petropavl – Tartyl Fest festıvali bolatyn 13 qala. Sport merekesi Memlekettik rámizder alańynda ótedi. Uıymdastyrý komıtetiniń málimetinshe, saǵat 11:00 men 14:00 aralyǵynda qatysýshylardy tirkeý, salmaqtaryn ólsheý jáne rettik nómir berý rásimi bolady. Al, saǵat 17:00-de festıvaldiń ashylý saltanaty.
Qazaqstan estrada ánshisi Ǵadilbek Jańaı arnaıy qonaq retinde shaqyrylǵan. Ártistiń qatysýymen saǵat 20:00-de kontsert bastalmaq.
«Mádenıet salasy qyzmetkerleriniń arasynda kim eń joǵary nátıje kórsetedi, biz oǵan syılyq retinde basseınge jyl sońyna deıin abonement syılaýǵa sheshim qabyldadyq. Sondyqtan, dostar qatysyńyzdar, salamatty ómir saltyn nasıhattańyzdar», - dedi SQO mádenıet, tilderdi damytý jáne arhıv isi basqarmasynyń basshysy Dosbol Ábdirısov.
Esterińizge salaıyq, festıval elimizdiń 20 qalasynda 10 shilde men 6 qyrkúıek aralyǵynda ótpek. Tartyl Fest-ke qatysýshylar 9 sanat – salmaq jáne jas erekshelikteri boıynsha jarysady. Olardy resmı túrde qazylar alqasy baǵalaıdy.
Qatysýshylardyń sanattary:
18 jasqa deıin (jasóspirimder):
1) salmaǵy - 55 kg deıin;
2) salmaǵy - 55-ten 70 kg-ǵa deıin;
3) salmaǵy - 70 kg jáne odan joǵary;
18 jastan 30 jasqa deıin (jastar):
4) salmaǵy - 65 kg deıin;
5) salmaǵy - 65-ten 80 kg-ǵa deıin;
6) salmaǵy - 80 kg jáne odan joǵary;
30 jas jáne odan joǵary (eresekter):
7) salmaǵy - 80 kg deıin;
8) salmaǵy - 80-nen 90 kg-ǵa deıin;
9) salmaǵy - 90 kg jáne odan joǵary.
Ár qaladan 27 jeńimpaz tańdalyp alynady. Birinshi orynǵa – 200 myń teńge, ekinshi orynǵa – 100 myń teńge, al úshinshi orynǵa – 50 myń teńge syılyqqa tigilgen. Sondaı-aq, jeńimpazdar Nur-Sultan qalasynda ótetin aqtyq synǵa joldama alady. Grand-fınaldyń júlde qory – 54 mln teńge.
Aıta ketsek, buǵan deıin Qostanaı qalasynda 51 jastaǵy Andreı Antonıan 45 ret týrnıkke tartylyp, jańa rekord ornatty.
