Tartyl Fest: Elordadaǵy jarysqa 650 adam ótinim berdi
Aıta keteıik, Tartyl Fest Prezıdent janyndaǵy «Dara» qoǵamdyq qorynyń qoldaýymen ótip jatyr. Týrnırdiń sońǵy 20-kezeńi Nur-Sultan qalasynda, EXPO aýmaǵyndaǵy sahnada ótedi.
Joba ambassadory, jattyqtyrýshy jáne akter Aıtym Jaqypovtyń aıtýynsha, elordada jarysqa qatysýǵa 650-den astam adam ótinim bergen jáne qatysýshylar jańa rekord ornatýǵa nıet bildirdi.
Ázirge respýblıka boıynsha týrnıkke tartylý rekordy - 50. Ony tarazdyq Evgenıı Nam ornatqan.
Týrnırdiń ashylý saltanatyna QR Mádenıet jáne sport mınıstri Dáýren Abaev, Nur-Sultan qalasy ákiminiń orynbasary Erlan Bekmyrzaev, «Dara» qoldaý qorynyń basshysy Nurlan Qoıanbaev, belgili sportshy Damır Mýmınov, joba ambassadory, qoǵam qaıratkeri Aıtym Jaqypov qatysty. Olardyń barlyq qatysýshyǵa sáttilik pen jeńis tiledi.
«Shynynda da, bul naǵyz buqaralyq sport túrine aınaldy. Munda eń myqtylar jeńedi. Barshańyzǵa zor sáttilik tileımin, uıymdastyrýshylarǵa úlken alǵysymdy bildiremin. Bul sharaǵa el boıynsha 12 myńnan astam adam qatysqanyn bilemin. Keı eresekter jastardy klavıatýradan bas kótermeıdi dep synaıdy, Tartyl Fest sııaqty jaqsy uıymdastyrylǵan sharalar bolsa, árıne jastar kóptep qatysady», - dedi Mádenıet jáne sport mınıstri festıval qatysýshylary men qonaqtaryna.
Mádenıet jáne sport mınıstri bul jobanyń toqtap qalmaıtynyn, aldaǵy jyldary da uıymdastyrylýy qajet ekenin atap ótti.
«Osyndaı sharalar jyl saıyn ótkizilse, bizdiń elimizge, jas balalarǵa jaqsy serpin beredi dep senemin. Eń bastysy tartylatyn týrnık ár aýylda bar, memlekettik qoldaýdyń arqasynda ár aýylda emes, ár aýlada bar. Qalǵan sport túrleri de osyndaı deńgeıge jetip, nátıje kórsetse, mindetti túrde qoldaý qajet», - dedi Dáýren Abaev.
Eske sala ketsek, týrnıkke tartylý festıvali 10 shildede Qonaev qalasynda bastalǵan edi. Keıin Túrkistanda, Taldyqorǵan, Almaty, Taraz, Shymkent, Aqtaý, Qyzylorda, Atyraý, Oral, Aqtóbe , Qostanaı, Petropavl, Kókshetaý, Jezqazǵan, Qaraǵandy, Óskemen, Semeı qalalarynda jalǵasyn tapty.
Shymkenttik Azamat Sapar týrnıkte 41 ret tartylyp, rekord ornatty. Buǵan deıin týrnıkke tartylý boıynsha rekord jasaǵan almatylyqtardy (40) basa ozyp, myqtylyǵyn dáleldedi. Al, 13 ret tartylǵan jeti jasar Mádıhan Qajymuqan uıymdastyrýshylardyń arnaıy syılyǵyna ıe boldy.
Odan keıin Aqtaý qalasynda 32 jastaǵy qatysýshy Damır Nábıev beltermirge 44 ret tartylyp, jańa rekord ornatty.
Bul rekordty 51 jastaǵy qostanaılyq Andreı Antonıan jańartty, ol týrnıkke 45 márte tartyldy.
Qaraǵandyda ótken týrnırde tarazdyq Evgenıı Nam esimdi qatysýshy týrnıkke 50 ret tartyldy. Osylaısha, ázirge Tartyl Fest rekordy Taraz qalasyna tıesili.
Jalpy festıval elimizdiń 20 qalasynda uıymdastyrylady, onda qazaqstandyqtar aqshalaı júlde jeńe alady. Ár qalada 27 jeńimpaz tańdalady.
Birinshi oryn úshin qatysýshylar 200 myń teńge, ekinshi oryn úshin – 100 myń teńge, úshinshi oryn úshin – 50 myń teńge aqshalaı syılyq alady.
Ár qalanyń jeńimpazdary (toǵyz sanatta) elordada ótetin grand-fınalǵa qatysady, onyń kúni jaqyn arada belgili bolady.
Grand-fınal chempıondary Street workout boıynsha álem chempıonatyna joldama alady.
