Tartyl Fest búgin Qostanaıda ótedi

QOSTANAI. QazAqparat - Týrnıkke tartylýdan Tartyl Fest respýblıkalyq sport festıvali búgin Qostanaı qalasynda jalǵasady, dep habarlaıdy QazAqparat tilshisi.

Tartyl Fest Qazaqstan Respýblıkasy Prezıdentiniń janyndaǵy «Dara» talanttardy qoldaý qory» QQ qoldaýymen ótkiziledi. Búgingi týrnırdiń ótetin orny - City center qalalyq alańy. Tirkeý, ólsheý jáne qatysýshylarǵa nómirler berý 9:00-den 12:00-ge deıin.

Festıvaldiń resmı ashylýy saǵat 18:00-de.

Uıymdastyrýshylardyń habarlaýynsha, týrnır aldynda Qostanaı oblysynda qaza tapqan bes jasar Mádına Erlanqyzyn eske alý úshin bir mınýt únsizdik jarııalanady. Qaıǵyly oqıǵaǵa baılanysty festıvaldiń kontserttik shoý-baǵdarlamasy toqtatyldy.

Festıvalge 20 qaladan kelgen qatysýshylarǵa ereje ortaq. Durys jáne kóp tartylý.

Qatysýshylar salmaǵy men jasyna qaraı toǵyz sanat boıynsha synǵa túsedi. Jarys resmı qazylar alqasynyń qatysýymen ótedi.

Qatysýshylardyń sanattary:

18 jasqa deıin (jasóspirimder):

1) salmaǵy - 55 kg deıin;

2) salmaǵy - 55-ten 70 kg-ǵa deıin;

3) salmaǵy - 70 kg jáne odan joǵary;

18 jastan 30 jasqa deıin (jastar):

4) salmaǵy - 65 kg deıin;

5) salmaǵy - 65-ten 80 kg-ǵa deıin;

6) salmaǵy - 80 kg jáne odan joǵary;

30 jas jáne odan joǵary (eresekter):

7) salmaǵy - 80 kg deıin;

8) salmaǵy - 80-nen 90 kg-ǵa deıin;

9) salmaǵy - 90 kg jáne odan joǵary.

Festıval 10 shilde men 6 qyrkúıek aralyǵynda elimizdiń 20 qalasynda uıymdastyrylyp jatyr, jeńimpazdarǵa aqshalaı syılyqtar beriledi.

Ár qaladan 27 jeńimpaz irikteledi.

Birinshi oryn úshin ár sanattaǵy qatysýshylar 200 myń teńge aqshalaı syılyq alady; ekinshisine – 100 myń teńge; úshinshige – 50 myń teńge.

Óńirdegi jeńimpazdar (toǵyz nomınatsııa boıynsha) Nur-Sultan qalasynda 8 qyrkúıekte ótetin grand-fınalǵa qatysady.

Grand-fınaldyń júlde qory 54 mıllıon teńge. Grand-Fınal chempıondary Street workout boıynsha álem chempıonatyna qatysa alady.

Joba ambassadory - qoǵam qaıratkeri, jattyqtyrýshy jáne akter Aıtym Jaqypov.

Ol Qazaqstan jáne álem boıynsha street workout-tyń birneshe dúrkin jeńimpazy, Streetlifting boıynsha Eýropa rekordsmeni, sondaı-aq Qazaqstandaǵy streetworkout qozǵalysynyń negizin qalaýshylardyń biri.

Street workout-kóshedegi sport alańdarynda túrli jattyǵýlar oryndalatyn áýesqoı sport túri.