«Tartyl Fest»: 11 jasar óskemendik oqýshy óz tobynda úzdik atandy
55 kelige deıingi salmaq dárejesi boıynsha 18 fınalıstiń ishinen 11 jastaǵy óskemendik Mansur Ýalıev 1-oryn aldy. Ol irikteý týrnırindegi kórsetkishin qaıtalap, 36 ret tartyla aldy.
«Júldege beretin 3 mln teńgeni ata-anama tabystaımyn», - deıdi jas sportshy.
Sportshynyń jeke bapkeri jeńimpazdyń negizgi jattyqtyrýshysy ákesi ekenin aıtady.
«Bul bala dzıýdo, jeńil atletıka, gir kóterý, qol kúresi sııaqty birinshe sport túrimen aınalysady. Osy joba týraly shilde aıynda estidik. Keıin erejesin pysyqtap, daıyndyqqa kiristik. Óskemende ótken irikteýde óz salmaǵynan jeńimpaz bolyp, búgin Astanada top jaryp otyr. Óskemen qalasyndaǵy №15 mektepte, 5-synypta bilim alyp júr. Negizgi bapkeri – ákesi Erlan Ýalıev. Ol qol kúresimen shuǵyldanady. Jaýapty jarysqa men ázirlep ákeldim», - deıdi Ádil Abdyǵalıev.
Jalpy, bul topta synǵa túsken qalǵan fınalısterdiń jasy 14 pen 17 aralyǵynda.
Eske salsaq, QR Prezıdenti janyndaǵy «DARA» talanttardy qoldaý qorynyń bastamasymen uıymdastyrylǵan týrnırdiń aqtyq synyna óńirlik irikteý jarystarynda úzdik nátıje kórsetken 170 sportshy qatysady. Qatysýshylardyń jasy – 11-51 jas aralyǵynda.
Týrnıkke tartylý jarysy byltyr Qazaqstannyń 20 qalasynda ótti. Onda 7 myńnan astam qazaqstandyq 9 salmaq dárejesinde saıysqa túsip, 33 jastaǵy tarazdyq Evgenıı Nam 50 ret kórsetkishpen týrnır rekordyn ornatqan.
EXPO aýmaǵyndaǵy Kongress ortalyqta ótip jatqan grand-fınaldan «Jibek Joly» telearnasy tikeleı kórsetilim taratady.
Grand-fınaldyń jalpy júlde qory – 54 mln teńge. Óz salmaq dárejesi boıynsha 1-oryn alǵan jeńimpazdarǵa 3 mln teńge, 2-oryn alǵandarǵa 2 mln teńge, 3-oryn ıelengenderge 1 mln teńge syıaqy beriledi.
Bul grand-fınalda chempıon atanǵandar Street Workout boıynsha álem chempıonatynda Qazaqstan atynan saıysqa túse alady.
