Tártipsizdikter kezinde Almaty áýejaıynyń qyzmetkerleri evakýatsııany qalaı júrgizdi
Áýejaı aýysymynyń bastyǵy Farhat Sábıtov evakýatsııa shamamen 19:45-te bastalǵanyn eske saldy. Qyzmetkerlerine tıisti pármen bergen.
«Bizge zııan keltirgisi keletin jas adamdar kele jatyr degen aqparat aldyq. Men áýejaıdyń barlyq qyzmetkerine evakýatsııa týraly buıryq berdim. Avtobýstar perronǵa shyqty. Qyzmetkerler jolaýshylardy qaýipsiz jerge kóshire bastady. Bizde ýaqytsha saqtaý qoımalary bar, bul tótenshe jaǵdaı kezinde qyzmetkerler men jolaýshylardy aparatyn jerimiz. Maǵan qyzmetkerler kómektesti. Olar qoıylǵan mindetti durys oryndady, olarǵa kóp rahmet. Olar qoryqpady, nusqaý boıynsha naqty jumys istedi», - dedi ol.
Onyń aıtýynsha, 50-ge jýyq buzaqy bolǵan. «Evakýatsııa bolyp, biz qyzmetkerlermen sońǵy bolyp shyqqanda, jastar bizge júgirip keldi, olardyń kózderi qyzarǵan boldy. Men muny birinshi ret kórdim. Mende azdap qorqynysh boldy», - dep esine alady aýysym bastyǵy.
Sonymen qatar, ol urlanǵan ushaqtar, zardap shekken qyzmetkerler men jolaýshylar joq ekenin málimdedi. Olardan eshqandaı qaýip tóngen joq.
Farhat Sábıtov bul kúni áýejaıda eki júk jáne eki jolaýshylar ushaǵy bolǵanyn aıtty. Olar Bishkek (100-den astam adam) pen Máskeýge (160 adam) ushýy tıis boldy. Sondaı-aq, Seýlden (Ońtústik Koreıa) 80 jolaýshysy bar ushaq kelip qonǵan.
«Bul jolaýshylar Koreıadan kelgen. Áýejaı aýmaǵynda jaǵdaıdyń tynysh ekenine kóz jetkizgen soń, olardy borttan aqyryndap evakýatsııalaı bastadyq. Jolaýshylardyń kózderinen qorqynysh kórdik. Jolaýshylardy reısten tún jamylyp, jaryqtardy óshirip evakýatsııaladyq», - dedi ol.
Ol termınaldardan 900-ge jýyq adam evakýatsııalanǵanyn atap ótti. Olar tańǵy 05.00-de áskerıler kelgenge deıin qaýipsiz jerde boldy.
Taǵy bir qyzmetker, termınaldyń aýysym bastyǵy Arkin Nuranbekov barlyq qyzmetkerlerdiń óz mindetterin oryndaǵanyn atap ótti. Eshkim qashyp ketpedi. Olar jolaýshylardy platforma jaǵynan evakýatsııalady.
«Túnde osynda boldyq. Bizde jolaýshylar mingen úsh ushaq osynda boldy. Jolaýshylar men ekıpajdyń qaýipsizdigi - biz úshin birinshi mindet. Olarǵa tamaq pen sýsyn uıymdastyrdyq. Olarǵa evakýatsııalanýdy usyndyq. Keıbireýlerin alyp shyqtyq, al basqalary ushaqta qalýdy jón kórdi. Men osynda aýysym bastyǵymen sońyna deıin boldym, sonymen qatar, áskerılermen birge boldym. Olar bizge josparyn, búlikshilerdiń osal tustaryn kórsetti. Sodan keıin olar tazalaýǵa kiristi. Tonaýshylar kóp boldy», - dedi ol.
Arkin Nuranbekov barlyq jolaýshylardyń úreılenip turǵanyn baıqady. «Keshe bir áıel kózine jas alyp, bárimizge alǵysyn bildirdi. Alǵys sózder kóp. Biraq biz jaǵdaıǵa qaraı áreket ettik. Biz buǵan daıynbyz dep aıtpaımyn, biraq, evakýatsııa jospary bar. Qoıylǵan bombalar týraly jasyryn qońyraýlar túskende bizde evakýatsııa bolady. Biraq, mundaı jaǵdaı meniń jumysymda birinshi ret boldy», - dedi Arkin Nuranbekov.
Perrondaǵy avtobýstardyń biriniń júrgizýshisi Amangeldi Mangetaev jurtpen qosa ózi de shoshyp ketkenin aıtty. Biraq, ol nusqaýlardy oryndady. Nátıjesinde perrondaǵy avtobýstardyń árqaısysy termınaldan evakýatsııalaý ornyna úsh-tórt reıs jasady.
Avıatsııalyq qaýipsizdik qyzmetiniń tekserý bólimshesiniń aǵa ınspektory Ásel Býdeneeva jolaýshylardy evakýatsııalaý kezinde tonaýshylar perron avtobýsyn toqtatpaq bolǵanyn jáne. barlyǵyn óz jaǵyna ótýge shaqyrǵan.
«Eń aldymen jolaýshylar men balalar evakýatsııalandy. Biz barlyǵyn júk bólimi arqyly shyǵardyq, qyzmet kórsetýshi personal perronǵa shyqty, avtobýstar kele bastady. Adamdar dúrbeleńge tústi, shamadandaryn laqtyrdy. Jolaýshylar mingen bir avtobýs ketip qalsa, ekinshisi keldi. Ol da ketip qaldy. Eń sońynda áriptesim ekeýmiz avtobýsqa kirip, avtobýs qozǵala bastaǵanda kólikke tonaýshylar kirip ketti. Bireýi avtobýstyń ortasynda turyp, ornymyzda qalýdy talap etti jáne bas adamnyń kim ekenin surady. Olarǵa qarapaıym azamattar ekenimizdi, bizdi otbasymyz kútip turǵanyn aıttyq. Sosyn olar ózderimen áýre bolǵanda, biz ketip qaldyq. Men qoryqpadym. Nemenege qorqam? Olarda qarý bolǵan joq. Meni eń aldymen balalar men jolaýshylar, bizdiń ınspektorlar alańdatty», - dedi ol.
Buǵan deıin halyqaralyq áýejaıdyń baspasóz qyzmetiniń jetekshisi Naılıa Jabagına 5 qańtarda keshki ýaqytta áýejaıǵa kelgen agressıvti azamattar negizinen jalǵa alýshylardyń býtıkterin qıratyp, terezelerin syndyryp, beınekameralar ornalasqan serverlik bólmelerge jetkenin aıtqan bolatyn. Munyń barlyǵyn áýejaı qyzmetkerleri qalpyna keltirdi.
Aıta keteıik, áýejaı 13 qańtarda jumysyn qaıta bastady, al 19 qańtardan bastap shtattyq rejımde jumys istep jatyr. Buǵan deıin biz tártipsizdikten keıingi áýejaıdyń kelbetin kórsetken bolatynbyz.
