Tarıhshy-ǵalymdardan quralǵan ekspedıtsııa kóne Tarazǵa jetti
TARAZ. KAZINFORM — Qaraǵandy oblystyq tarıhı-ólketaný mýzeıi Joshy Ulysynyń 800 jyldyǵyna arnalǵan «Talas-Ulytaý-Saraıshyq» atty respýblıkalyq tarıhı-etnografııalyq ekspedıtsııa uıymdastyrdy. Keshe bir top tarıhshy-ǵalym, ekspedıtsııa qatysýshylary jolǵa shyǵyp, Tarazǵa jetti.
«Ekspedıtsııa marshrýty boıynsha Jambyl, Ulytaý, Qyzylorda, Aqtóbe, Túrkistan jáne Atyraý oblystarynyń arheologııalyq, arhıtektýralyq eskertkishterin tolyq kólemde zerdeleý Joshy Ulysy men Altyn Orda dáýirindegi Qazaqstan tarıhyn zertteýge jan-jaqty qaraýǵa múmkindik beredi», — deıdi oblystyq oblystyq Mádenıet, muraǵattar jáne qujattama basqarmasynyń basshysy Erkebulan Jumakenov.
Ekspedıtsııa quramynda elimizdegi tarıhshy-ǵalymdardan bólek baýyrlas Túrkııa elinen kelgen arheolog Choban Akaıal, etnolog, M.Ammosov atyndaǵy Soltústik-Shyǵys federaldy ýnıversıtetiniń magıstranty, Altyn Orda tarıhyn zertteýshi, tarıhshy, Reseı Federatsııasynan kelgen Saına Mıhaılova sekildi alys jaqyn shet elden kelgen tarıhshylar bar. Bul degenimiz ekspedıtsııanyń keń aýqymyn kórsetedi.
«Ekspedıtsııa barysynda Joshy Ulysynyń tarıhymen baılanysty arheologııalyq, arhıtektýralyq, memorıaldyq nysandardyń qazirgi jaǵdaıyna baqylaý júrgiziledi. Týrıstik baǵytty arttyrý boıynsha usynystar ázirlenedi, foto, beıne, aýdıo formatta tanymdyq aqparattyq ónimder daıyndalady. Ǵalymdar, tarıhshylar men mamandardyń suhbaty negizinde derekti fılm túsirilip, halyqqa usynylady», — deıdi oblystyq Tarıhı-ólketaný mýzeıiniń basshysy Erjan Nurmaǵanbetov.
Joshy Ulysynyń 800 jyldyǵyna arnalǵan «Talas-Ulytaý-Saraıshyq» respýblıkalyq tarıhı-etnografııalyq ekspedıtsııalyq kóshi 20 qyrkúıek – 1 qazan aralyǵynda jolda bolady.
Ekspedıtsııa búgin «Tekturmas» Etno-tarıhı kesheni, Ejelgi Taraz álemi qalashyǵy, Qarahan kesenesi, Jánibek-Kereı handarynyń eskertkishi, Aısha bıbi kesenesine barady.
