Tarıhı derekterdi qazirgi saıasattyń múddesine paıdalanýǵa bolmaıdy - Prezıdent

ASTANA. KAZINFORM – Tarıhı derekterdi qazirgi saıasattyń múddesine paıdalanýǵa bolmaıdy. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.

– Ázil aıta bilý jáne tarıhı derekterdi jetik bilý úlken saıasatta da joǵary baǵalanady. Men kásibı tarıhshy emespin. Sondyqtan kóptiń aldynda ótken dáýirlerge qatysty taqyryptarǵa bara bermeımin. Biraq tarıhqa qyzyǵamyn, kitaptar men maqalalar oqımyn. Dese de tarıhı derekterdi qazirgi saıasattyń múddesine paıdalanýǵa bolmaıdy dep sanaımyn, - dedi Memleket basshysy.

Osy rette Prezıdent belgili jazýshy, dramatýrg Edvard Radzınskıı ótken ǵasyrdaǵy 80-shi jyldardyń basynda Stalın týraly irgeli zertteý kitabyn jazǵanyn atap ótti.

- Qalamgerdiń elge «qaıta qurý qaharmandary» retinde tanylǵan dostary «Seniń Stalıniń kimge qajet? Ashyqtyq pen demokratııa dáýiri bastalǵanyn bilmeısiń be? Stalınızm zamany kelmeske ketti» dep keketse kerek. Sonda jazýshy «Men kitapty jazyp bitirgen kezde jurt Stalınniń sýretin kóterip alyp, kóshede júretin bolady» degen eken. Aqyry solaı bolyp shyqty, - dedi Qasym-Jomart Toqaev.

Memleket basshysynyń paıymynsha, tarıhtan talaı nárseni úırenýge bolady, kúni keshe ǵana qýǵynda júrgen jandar erteń-aq uly tulǵa atanady.

- Esesine, Lenın syndy kósemderdiń ájýaǵa aınalýy op-ońaı, halyq onyń qanatty sózderin áldeqashan umytqan. Al, Trotskıı óz estelikterinde «partııamyzdyń eń kórnekti ortaqol adamy» dep ataǵan Stalındi qazir jurt madaqtaıdy, tipti, «Kadr bárin sheshedi», «Bala ákesi úshin jaýap bermeıdi», «Ómir qandaı keremet, ómir qandaı kóńildi», «Tabystan bas aınalý», «Gıtlerler keledi-ketedi, al nemis halqy qala beredi» degen sózderi úshin pir tutady. Osyndaı tarıhı paradokstar bizde de az emes, - dedi Prezıdent.

Qasym-Jomart Toqaev kez kelgen eldiń, sonyń ishinde bizdiń de tól tarıhymyzda qaıshylyqqa toly oqıǵalar men aqıqatynan ańyzy basym tulǵalar jetip artylatynyn aıtty.

- Tarıhı derekterdi burmalaý, halyqqa jasaǵan eńbegi kúmándi, ıaǵnı naqty málimettermen nemese qujattarmen dáleldenbegen adamdardy shamadan tys ulyqtap kórsetý – men úshin múlde aqylǵa qonbaıtyn nárse, - dedi Memleket basshysy.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.