Tarıfterdi ózgertý jalǵasa beredi – Oljas Bektenov

ASTANA. KAZINFORM — QR Premer-Mınıstri Oljas Bektenov Úkimette ótken baspasóz máslıhatynda turǵyn úı-sharýashylyq salasyndaǵy tarıfterdi ósirý qajettigin aıtty.

− Bul - halyqty tolǵandyratyn óte ózekti másele. Tarıfterdiń ósýi esh toqtatylǵan joq. Osy múmkindikti paıdalanyp aıtqym keledi: aldaǵy ýaqytta da tarıfter óse beredi. Bul – aýyr ári jaǵymsyz taqyryp, biraq Úkimet bul týraly ashyq aıtyp otyr jáne tarıfterdi naryqtyq deńgeıge jetkizý saıasatyn júrgizip jatyr, − dedi Úkimet basshysy.

Onyń aıtýynsha, tarıfter uzaq ýaqyt boıy qatty rettelip, turǵyn úı-kommýnaldyq sharýashylyqqa ınvestıtsııa salýǵa múmkindik bermegen jaǵdaı 2022-2023 jyldary Ekibastuzda, Rıdderde bolǵan apattarǵa ákep soqty.

− Eger qysta úıimiz jyly bolyp, jaryq, sý jáne ózge de ınjenerlik jeliler durys jumys istegenin qalasaq, onda tarıfterdi kóterý jolymen júrýimiz kerek. «Tarıfter ósýi ýaqytsha toqtatyldy» degen sóz – tek ınflıatsııaǵa túsetin qysymdy azaıtý úshin olardyń ósý qarqynyn qaıta qarastyrdyq degendi bildiredi. Jalpy alǵanda, bul saıasat jalǵasa beredi, − dedi O. Bektenov.

Aıta keteıik, búgin Úkimette bıylǵy qańtar-maýsym aılaryndaǵy áleýmettik-ekonomıkalyq damý jáne respýblıkalyq bıýdjettiń atqarylý qorytyndylary qaralyp jatyr. Qazaqstan ekonomıkasy 6 aıda 6,2 paıyz ósim kórsetken.