Tarazda jylyna 15 mln ekspress test shyǵaratyn óndiristik keshen salynyp jatyr

TARAZ. QazAqparat – Jambyl oblysynyń ákimi Berdibek Saparbaev jumys saparymen Taraz qalasyn aralady, dep habarlaıdy QazAqparat tilshisi.

Sapar barysynda oblys ákimi «Ámir jáne D» JShS qoımalary bar farmatsevtıkalyq óndiris kesheniniń qurylys barysymen tanysty. Munda ekspress test pen medıtsınalyq maqsattaǵy buıymdar shyǵarylady.

Jobalyq qýaty – jylyna 15 mıllıon ekspress test, 1,5 mıllıon baqylaý eritindisi jáne zararsyzdandyrýǵa arnalǵan 50 myńǵa jýyq orama.

Seriktestik basshylyǵynyń aıtýynsha, jańa óndiris kesheninde 150-den asa jańa jumys orny ashylady dep kózdelýde.

Osylaısha uıymnyń aýqymy keńeıip, jalpy ákimshilik-basqarý personaly, býhgalterııa, dárilik zattar jáne medıtsınalyq buıymdar qoımasy, olardy satý jáne satyp alý, ákimshilik-sharýashylyq, retseptýralyq-óndiristik, aqparattyq-tehnologııalar bólimderi men dárihanalardan quralady.

Berdibek Saparbaev farmatsevtıka ónerkásibi strategııalyq mańyzy bar baǵyttardyń biri bolyp qala beretindigin atap ótti.

Aıta keteıik, Prezıdent Qasym-Jomart Toqaev «Jańa jaǵdaıdaǵy Qazaqstan: is-qımyl kezeńi» atty Joldaýynda farmatsevtıka salasyn aıaqqa turǵyzatyn ýaqyt jetkenin basa aıtqan bolatyn.

Búginde óńirdegi bes jergilikti kompanııa dári-dármek óndirýmen aınalysady. Memlekettik qoldaýdy paıdalana otyryp, farmatsevtıka naryǵyndaǵy jambyldyq preparattar úlesin arttyrýǵa jaǵdaı jasaý qajettigine aıryqsha kóńil bólinýde.