Tarazda zeınetkerlerge arnalǵan uzaq ómir súrý ortalyǵy ashyldy
Memleket basshysy óziniń jyl saıynǵy Joldaýlarynda qarttar men zeınetkerlerdi qoldaý, olarǵa rýhanı-áleýmettik kómek kórsetý isine zor mán berip keledi. Osy maqsatta, Jambyl oblysynda jyl basynan beri «Belsendi uzaq ómir» jol kartasy iske qosylǵan. Baǵdarlama aıasynda ashylǵan «Belsendi uzaq ómir súrý ortalyǵy» bul baǵyttaǵy josparly jumystardyń bir parasy ǵana.
«Qazirgi tańda oblystyń barlyq aýdandarynda qarııalar bas qosatyn «Ardagerler uıymy» bar. Sondaı-aq, oblys ortalyǵyndaǵy sport keshenderinen ardagerlerge arnaıy bólmeler de berilgen. Búgin olardyń qatary taǵy bir nysanmen tolyqty. Jańa mekemede shahmat, toǵyzqumalaq ústelderi, shaǵyn kitaphana ornalastyrylǵan. Ortalyq arqyly zeınetkerlerdiń ómir súrý sapasyn, kompıýterlik bilimderin arttyrýǵa, psıhologııalyq, zańgerlik kómek alýǵa múmkindik jasalatyn arnaıy klýbtar ashylatyn bolady»,- deıdi oblystyq ardagerler keńesiniń tóraǵasy Erkinbek Soltybaev.
Aıta keteıik, búgingi tańda óńirde 123 myńnan astam zeınetker bar. Olardyń bos ýaqyttaryn tıimdi ótkizý men salaýatty ómir saltyn ustanýlaryna barlyq jaǵdaı jasalý kerek desek, atalǵan ortalyq osy baǵytta jumys jasamaq.
