Tarazda toǵyzqumalaqtan el chempıonaty ótip jatyr

TARAZ. QazAqparat - Taraz qalasynda toǵyzqumalaqtan jasóspirimder men jastar arasynda Qazaqstan Respýblıkasynyń chempıonaty ótip jatyr, dep habarlaıdy QazAqparat.

Jambyl oblysy ákimdiginiń baspasóz qyzmetinen málim etkendeı, 27 naýryzǵa deıin ótetin chempıonatqa 17 oblys jáne Astana, Almaty, Shymkent qalalarynan barlyǵy 20 qurama komanda qatysyp jatyr.

Toǵyzqumalaqtyń klassıka túrinen 350 oıynshy baq synaýda, al rapıd jáne blıtsten 50-ge jýyq sportshy jarysqa túsedi.

Sharanyń saltanatty ashylýyna Jambyl oblysy ákiminiń orynbasary Erkin Úısimbaev, Dúnıejúzilik toǵyzqumalaq qaýymdastyǵynyń vıtse-prezıdenti Batyrbek Qulekeev, oblystyq Sport basqarmasynyń basshysy Arman Táshmetov, toǵyzqumalaqtan QR memlekettik jattyqtyrýshy Dáýlet Ábdikárimov qatysty.

Chempıonattyń bas tóreshisi retinde joǵary ulttyq dárejedegi tóreshi Erbol Nurhanov qyzmet etýde.