Tarazda «Sot júıesi ǵalymdarynyń dıalogy» I Halyqaralyq forýmy ótti
Tarazda «Sot júıesi ǵalymdarynyń dıalogy» birinshi Halyqaralyq forýmy ótti. Oǵan Reseı, Túrkııa, Qyrǵyzstan, Ózbekstan jáne Belorýssııadan kelgen sheteldik zańger ǵalymdar, Joǵarǵy Sot tóraǵasy Jaqyp Asanov, Jambyl oblysynyń ákimi Berdibek Saparbaev, Joǵarǵy Sot, Sýdıalar odaǵynyń tóraǵasy Sáken Abdolla, Sot tóreligi akademııasynyń rektory Záýresh Baımoldına, Jambyl oblystyq sotynyń tóraǵasy Erbol Ahmetjanov, jergilikti joǵary oqý oryndarynyń rektorlary qatysty.
Aýqymdy shara Qazaqstan Sýdıalarynyń VIII Sezinde qoıylǵan tapsyrmalardy iske asyrý aıasynda uıymdastyryldy.
Joǵarǵy Sot Tóraǵasy Jaqyp Asanov sot ǵımaratyn «eń aldymen, sýdıalarǵa emes, protseske qatysýshy adamdarǵa qajet» dep atap ótti. Spıker 3 jyl ishinde 3 oblystyq sottyń jańa ǵımaraty paıdalanýǵa berilgenin, 2022 jyly taǵy da 4 ǵımarat salynatynyn jetkizdi.
«Jalpy alǵanda, sottyń mıssııasy bireý – sot tóreligin zańdy ári ádil júzege asyrý. Sottardyń kúndelikti qyzmeti men júrgizilip jatqan reforma azamattardyń, bıznes ókilderi men ınvestorlardyń senimin aqtaýǵa baǵyttalýy tıis», - dep túıindedi J. Asanov.
Jambyl oblysynyń ákimi Berdibek Saparbaev óz sózinde sot tóreliginiń ózekti máselelerin talqylaý jáne sot júıelerin damytý, sot qurylymy jáne zań ústemdigin qamtamasyz etýdegi ozyq tájirıbemen almasý alańyna aınalǵan halyqaralyq forým jumysynyń mańyzdylyǵyna toqtaldy.
«Sot júıesi – bılik tarmaqtarynyń biri jáne oǵan árdaıym basa nazar aýdarylady. Basty maqsat – adaldyq, zańdylyq, ádilettilik qaǵıdattaryn basshylyqqa ala otyryp, azamattardyń quqyqtaryn qorǵaý. Sizderge quqyqtyq tártipti qamtamasyz etý, qoǵamdaǵy turaqtylyqty nyǵaıtý, áleýmettik, eńbek daýlaryn sheshýde úlken jaýapkershilik júkteledi. Búginde sot júıesine reforma júrgizilýde. Memleket basshysynyń tapsyrmasyna sáıkes «Halyq únine qulaq asatyn memleket» tujyrymdamasy júzege asýda. Sondaı-aq, jańa aqparattyq tehnologııalar qarqyndy túrde qoldanysqa enýde, «Vırtýaldy sot» jobasy iske qosyldy, bul jumystyń jeńildeýine, halyq úshin sot tóreliginiń ashyqtyǵy men qoljetimdiligine múmkindik berýde. Osyndaı aýqymdaǵy is-sharanyń Tarazda ótýiniń ózin máni bar. Óńirimizden shyqqan tulǵalar arasynda sot júıesiniń damýyna eleýli úles qosqandar az emes», - dedi oblys ákimi.
Aımaq basshysy jergilikti bılik pen sýdıalar korpýsy arasynda tyǵyz qarym-qatynas ornatýdyń mańyzdylyǵyn atap ótti. Medıatorlardyń, Bıler keńesiniń jumysyna basa toqtaldy.
Sýdıalar odaǵynyń tóraǵasy Sáken Abdolla respýblıka sottarynda 91 ǵalym eńbek etetinin atap ótti.
Jambyl oblystyq sotynyń sýdıasy, zań ǵylymdarynyń kandıdaty Lazzat Ramazanova óz baıandamasynda Jambyl oblysynda jazalardy oryndaý boıynsha mamandandyrylǵan sot qurýdyń pılottyq jobasyn iske asyrý jónindegi usynys engizdi.
Sondaı-aq forým aıasynda eki kitap jınaǵy tanystyryldy. Onyń birinde – sot júıesiniń ǵalymdary týraly aqparat bolsa, ekinshisinde olardyń ǵylymı jarııalanymdary jınaqtalǵan.
