Tarazda shýly saýda ortalyǵy sot sheshimimen oqshaýlanady

TARAZ. KAZINFORM — Qaladaǵy bir ǵımarattyń turǵyndary saýda nysanynyń ruqsat etilgen shý deńgeıinen asyp, tynyshtyqty buzyp otyrǵanyn dáleldedi. Endi kásipkerler jabdyqtardy oqshaýlap, turǵyndar shyǵynyn óteýge mindetti, dep habarlaıdy Kazinform tilshisi.

Taraz qalalyq sotynda qala turǵynynyń zańdy tulǵaǵa qatysty aryzy boıynsha sot otyrysy aıaqtaldy. Ol zeınetkerlerdiń uıyqtaýyna kedergi keltirip, turǵyndardyń qalypty demalý quqyǵyn buzǵan saýda ortalyǵynan shyqqan shýdy joıýdy talap etti.

Turǵyndardyń ýákiletti organdarǵa jazǵan aryzdarynan esh nátıje shyqpaǵan. Alaıda, sotta turǵyndar júrgizgen saraptama sheshýshi dálel boldy, ol ruqsat etilgen shý deńgeıinen asyp, 49,5 dB qurady (norma 40 dB).

Tatýlasý rásiminiń nátıjesinde taraptar bitimgershilik kelisimge keldi. Jaýapker talapkerge saraptama júrgizýge jumsaǵan 84 myń teńge shyǵyndy óteýge jáne shýdyń kózi — jabdyqtyń dybysoqshaýlaǵyshyn jasaýǵa mindettendi. Óz kezeginde talapker qosymsha talaptardan bas tartty. 

Sot bitimgershilik kelisimdi bekitti. Іs toqtatylyp, talapkerge tólengen memlekettik baj qaıtaryldy.

Budan buryn Tarazda oqýshynyń anasyna balasynyń býllıng áreketi úshin aıyppul salyndy.