Tarazda saýda ortalyǵynan jarylǵysh zat tabylǵan joq
ASTANA. KAZINFORM – Tekserý nátıjesinde eshqandaı jarylǵysh zat tabylǵan joq.
15 aqpanda «102» pýltine saýda ortalyǵyna jarylǵysh zat qoıylǵany týraly habarlama kelip túsken.
Jambyl oblysy Polıtsııa departamentiniń, UQK jáne TJD qyzmetkerleri arnaıy jedel áreket etý jasaǵynyń, jedel-tergeý tobynyń jáne kınologtardyń qatysýymen ortalyq ǵımaratyna jedel tekserý júrgizdi.
- Tekserý nátıjesinde eshqandaı jarylǵysh zat tabylǵan joq. Ǵımarattan saýda dúkenderiniń ıeleri men ortalyqqa kelýshiler bar 2 myńǵa jýyq adam evakýatsııalandy, - delingen Jambyl oblysy PD habarlamasynda.
Atalǵan derek boıynsha sotqa deıingi tergeý bastaldy.
Jambyl oblysy Polıtsııa departamenti Qylmystyq kodekstiń 273-babyna sáıkes terrorızm aktisi týraly kórineý jalǵan habar bergeni úshin qylmystyq jaýapkershilik qarastyrylǵanyn eske salady, - delingen habarlamada.
Eske salsaq Tarazda saýda ortalyǵynan adamdar evakýatsııalanyp jatqany týraly jazǵan edik.