Tarazda órt kezinde erlik kórsetken batyrlar marapattaldy
ASTANA. KAZINFORM — Tótenshe jaǵdaılar mınıstri general-maıor Shyńǵys Árinovtiń buıryǵyna sáıkes Alısultan Baırahtarov pen Islam Mýradov «Órtte kórsetken qaısarlyǵy úshin» medaline ıe boldy, dep habarlaıdy vedomstvonyń baspasóz qyzmeti.
Oblystyq TJD basshylyǵy nemquraıdylyq tanytpaı, batyldyq pen qıyn sátte kómek kórsetýge daıyn bolǵany úshin batyrlarǵa alǵys bildirdi.
Eske salaıyq, 2025 jylǵy 6 qyrkúıekte Taraz qalasynyń Jambyl dańǵyly boıyndaǵy kópqabatty turǵyn úıde órt boldy.
— Alǵashqy bolyp jaǵdaıdy baıqaǵandar — qala jastary Alısultan Baırahtarov pen onyń dosy Islam Mýradov boldy. Olar oılanbastan «112» nómirine qońyraý shalyp, kireberisterdi aralap, turǵyndardy qaýip týraly eskertip, evakýatsııalaýǵa kómektesti. Olardyń jedel áreketteriniń arqasynda adamdar der kezinde syrtqa shyǵarylyp, órt sóndirýshiler kelgenshe qaıǵyly jaǵdaıdyń aldyn alýǵa múmkindik týdy, — dep atap ótti vedomstvoda.
Alısultan Baırahtarovtyń azamattyq belsendiligin de atap ótken jón. Ol oqıǵany uıaly telefonyna túsirip, keıin beınerolıkti TikTok jáne Instagram áleýmettik jelilerinde jarııalady. Beınerolık 7 mıllıonnan astam qaralym jınap, qoǵamnyń nazaryn órt qaýipsizdigi máselelerine aýdaryp, azamattyq qorǵaý qyzmetiniń oń ımıdjin qalyptastyrýǵa yqpal etti.
Bul oqıǵa qarapaıym turǵyndardyń erligi men azamattyq jaýapkershiliginiń adam ómirin qutqarýda qanshalyqty mańyzdy ekenin kórsetken aıqyn úlgi boldy.
Budan buryn habarlanǵandaı, Almaty oblysynda órt saldarynan 2 adam mert boldy.