Tarazda oqýshyny óltirdi degen kúdikpen jasóspirim ustaldy

TARAZ. KAZINFORM – 1 qyrkúıekte bolǵan janjal saldarynan bir jasóspirim pyshaq jaraqatynan kóz jumdy. Qylmysqa kúdikti retinde taǵy bir oqýshy ustaldy, dep habarlaıdy Kazinform tilshisi. 

Bilim kúni Tarazda qaıǵyly oqıǵamen aıaqtaldy. Keshkisin áleýmettik jelilerde eki mekteptiń oqýshylary arasyndaǵy jappaı tóbeles týraly aqparat tarady, onyń saldarynan bir jasóspirimniń qaza tapqany aıtyldy.

Qalalyq bilim bólimi oqýshynyń qaza tapqanyn rastaǵanymen, oqıǵaǵa qatysty tarap ketken qaýesetterdi joqqa shyǵardy.

— Eki mektep oqýshylary arasyndaǵy tóbeles týraly aqparat shyndyqqa sáıkes kelmeıdi. Toptyq qaqtyǵystardyń faktileri anyqtalǵan joq. Oqıǵa oqý protsesinen tys jerde bolǵan. Qaqtyǵys turmystyq sıpatta, al jasóspirimder buryn bir-birimen tanys bolmaǵan, — delingen resmı habarlamada.

Belgisiz jaǵdaılardyń saldarynan jasóspirim pyshaq jaraqatynan kóz jumdy. Polıtsııa marqumnyń qazasyn rastady. Kámeletke tolmaǵan kúdikti ustalyp, ýaqytsha ustaý ızolıatoryna qamaldy.

— Atalǵan fakti boıynsha QR QK-niń 99-baby («Adam óltirý») boıynsha qylmystyq is qozǵaldy. Bolǵan oqıǵanyń barlyq mán-jaıyn anyqtaý úshin jedel-tergeý sharalary júrgizilýde, — dep atap ótti departament ókilderi.

Eske salaıyq, buǵan deıin Tarazda 15 jastaǵy jasóspirim sýıtsıd jasaǵan edi.