Tarazda oqýshylardy qaýipsizdik erejesi saqtalmaǵan avtobýstarmen tasymaldaǵan

TARAZ. KAZINFORM – Taraz qalasynyń prokýratýrasy qala mektepterinde balalardy tasymaldaý kezinde qaýipsizdikti saqtaý máselesi boıynsha tekserý júrgizdi. Nátıjesinde tasymaldaý erejeleriniń talaptary buzylǵany anyqtaldy. Bul týraly Jambyl oblystyq prokýratýrasy habarlady. 

Tekseris nátıjesi kórsetkendeı, qala mektepterindegi 19 avtobýstyń 10-y Investıtsııalar jáne damý mınıstriniń m. a. 2015 jylǵy 26 naýryzdaǵy № 349 buıryǵymen bekitilgen Jolaýshylar men bagajdy avtomobıl kóligimen tasymaldaý erejeleriniń talaptaryna saı bolmaı shyqqan. 

Atap aıtqanda, júrgizýshiler reıs aldynda medıtsınalyq tekserýden ótpegen, avtobýstarda medıtsınalyq qobdıshalar, órt sóndirgishter, «Balalardy tasymaldaý» belgileri bolmaǵan.

«Avtobýstarda tasymaldanatyn balalardyń jalpy sany otyrýǵa arnalǵan oryndardyń sanynan asyp túsken.  Balalardyń qaýipsizdigine qater tóndire otyryp, júrgizýshi tasymaldaýdy júrgizýshi kýáliginiń tıisti sanaty bolmaı, saqtandyrý polısinsiz jáne tehnıkalyq baıqaýdan ótpeı júzege asyrǵan» - delingen habarlamada.

Prokýrorlyq qadaǵalaý aktilerimen kináli adamdar ákimshilik jáne tártiptik jaýapkershilikke tartyldy.