Tarazda medıtsınalyq ýnıversıtettiń fılıaly ashyldy
Medıtsınalyq kadrlardyń jetispeýshiligi Jambyl óńiri úshin de, ásirese aýyldyq jerlerde mańyzdy bolyp otyr. Oblys basshylyǵy S.Asfendııarov atyndaǵy Qazaq ulttyq medıtsına ýnıversıtetimen birlesip, joǵary deńgeıli kadrlardy daıarlaýdyń ózindik júıesin jolǵa qoıa otyryp, atalǵan máseleni túbegeıli sheshýdi josparlaýda.
Dúısenbi, 28 jeltoqsan kúni oblys ákimi Berdibek Saparbaev pen QazUMÝ rektory Talǵat Nurǵojın Taraz qalasyndaǵy Jambyl joǵary medıtsınalyq kolledjiniń bazasynda atalǵan ýnıversıtettiń fılıalyn ashty. Bastapqy kzde shamamen 100 adam oqýdy bastaýda desek, rezıdentterdi belsendi túrde tartý kózdelgen.
Kolledj dırektory Jámıla Sarybekova qonaqtarǵa pándik kabınetterdi aralatyp, telestýdııa, murajaı, kitaphana jáne memleket elektrondyq qyzmetterdi usynýǵa arnalǵan ǵımarattardy tanystyrdy. Óńir basshysy múgedektigi bar stýdentterdiń bilim alýyna jasalǵan jaǵdaıdyń, ınklıýzıvti bilim berýdi damytý men túlekterdiń jumysqa ornalasý múmkindigine kóńil bóldi.
Jámıla Sarybekovanyń aıtýynsha, kolledjde ınklıýzıvti top qurylǵan. Túlekterdi jumysqa ornalastyrý úshin oblystaǵy 41 densaýlyq saqtaý mekemesimen yntymaqtastyq týraly kelisimsharttar jasalǵan.
Kolledj ujymymen kezdesýde Berdibek Saparbaev pandemııa jaǵdaıynda densaýlyq saqtaý salasyn memlekettik qoldaý aıtarlyqtaı artqanyn atap ótti.
«Pandemııa bizdiń burynnan kele jatqan máselelerimizdi, birinshi kezekte saladaǵy kadrlardyń tapshylyǵyn kórsetip berdi. Búgingi kúni shamamen 250 bos jumys orny bar. Másele júıeli túrde sheshilýi kerek. Osyny eskerip biz qyrkúıek aıynda S.Asfendııarov atyndaǵy Qazaq ulttyq medıtsınalyq ýnıversıtetimen yntymaqtastyq ornatyp, tıisti memorandým jasadyq. JOO-nyń tájirıbeli dárigerleri shalǵaı aýdandardaǵy jergilikti medıtsınalyq qyzmetkerlerge kómektesip, tájirıbelerimen bólisedi. Bul tájirıbeli dárigerlermen, professorlarmen qoıan-qoltyq jumys istep, tájirıbesin meńgerýge, ǵylymdy damytýǵa tamasha múmkindik», - dep atap ótti aımaq basshysy.
Talǵat Nurǵojınniń aıtýynsha, yntymaqtastyq barlyq taraptarǵa tıimdi. Ýnıversıtet kolledj oqytýshylary úshin doktorantýrada oqýdy uıymdastyrýǵa, oqý protsesine jańa tehnologııalardy engizýge qabiletti. Japonııa jáne basqa da damyǵan elderdiń joǵary oqý oryndarymen tyǵyz baılanys ornata otyryp, jambyldyq oqytýshylar men dárigerlerdiń biliktiligin arttyrý úshin sol jaqqa jiberýge bolady.
«Jumys jolǵa qoıyla kele basqa da múmkindikter ashylatyn bolady», - dep túıindedi Talǵat Nurǵojın.
