Tarazda qyzdy urlap ketti: úsh kúdikti ustaldy
ASTANA. KAZINFORM — ІІM-niń resmı ókili Shyńǵys Alekeshevtiń málimetinshe, Tarazda qyzdy urlady degen kúdikke ilingen úsh adam ustalyp, ýaqytsha ustaý ızolıatoryna qamaldy.
Derekterge sáıkes, tergeý Qylmystyq kodekstiń 125-1-baby («Neke qııýǵa májbúrleý») boıynsha júrgizilip jatyr. 2025 jyldyń qyrkúıeginen bastap bul áreket resmı túrde qylmys sanatyna engizilgen. Atalǵan bap boıynsha jaza retinde 2000 aılyq eseptik kórsetkishke (2025 jyly shamamen 7,9 mln teńge) deıin aıyppul salý nemese eki jylǵa deıin bas bostandyǵynan aıyrý qarastyrylǵan. Eger is aýyr zardaptarǵa nemese aýyrlatatyn mán-jaılarǵa ıe bolsa, jaza merzimi 5 jyldan 10 jylǵa deıin jetýi múmkin.
— Úsh kúdikti ustalyp, ýaqytsha ustaý ızolıatoryna qamaldy. Tergeý barysy ІІM basshylyǵynyń erekshe baqylaýynda. Barlyq kináli zańǵa sáıkes qatań jaýapqa tartylady, — dedi Jambyl oblysynda bolǵan oqıǵaǵa qatysty túsinikteme bergen Shyńǵys Álekeshev.
Mınıstrlik ókili jańa norma boıynsha túsindirý jumystary belsendi júrgizilip jatqanyn da atap ótti.
— Іshki ister organdary neke qııýǵa májbúrleý jáne azamattardyń jeke bas bostandyǵyna qarsy kez kelgen áreketterdiń aldyn alý úshin qatań sharalar qabyldaıdy. Jaza bultartpastyǵy qaǵıdasy tolyq qamtamasyz etiledi, — dedi ol.
Eske sala ketsek, ótken aptada Jambyl oblysynda qyzdy jurt kózinshe urlap ketken oqıǵa tirkelgen bolatyn.