Tarazda eki dúkenniń ǵana pırotehnıkalyq ónimder satýǵa ruqsaty bar

TARAZ. KAZINFORM — Jańa jyl qarsańynda Taraz turǵyndary salıýttar men feıerverkterdi japa-tarmaǵaı satyp alyp jatyr. Al Jambyl oblysynyń tótenshe jaǵdaılar departamenti pırotehnıkalyq ónimder zańdy túrde tek mamandandyrylǵan saýda oryndarynda ǵana satylatynyn eskertti, dep habarlaıdy Kazinform tilshisi.

Sertıfıkattalǵan pırotehnıkalyq ónimderdi satýǵa resmı ruqsat eki dúkende ǵana bar bolyp shyqty. Birinshisi — Sypataı batyr kóshesi, 13B mekenjaıynda ornalasqan «TARAZ-SALUTE Company» JShS. Ekinshisi — Uly Dala shaǵynaýdany, 31-úıde ornalasqan «BTR Company» JShS.

Departamenttiń málimetinshe, atalǵan eki uıym da bul naryqta birneshe jyldan beri jumys istep keledi jáne qazirgi ýaqytta qaladaǵy pırotehnıkalyq buıymdardy satatyn jalǵyz resmı tirkelgen satýshylar bolyp tabylady.

— Pırotehnıkalyq ónimderdi satyp alý kezinde satýshydan mindetti túrde sáıkestik sertıfıkattaryn talap etý qajet. Árbir buıymda memlekettik jáne orys tilderinde egjeı-tegjeıli nusqaýlyq bolýy tıis. Sondaı-aq jaramdylyq merzimine erekshe nazar aýdarý kerek, sebebi merzimi ótip ketken pırotehnıkany qoldanýǵa qatań tyıym salynady, — dedi Jambyl oblysy TJD memlekettik órt baqylaý basqarmasynyń basshysy Darhan Qaldyrbek.

Ol sondaı-aq pırotehnıkalyq buıymdardy qaýipsiz paıdalaný erejelerin eske saldy.

— Pırotehnıkany turǵyn úıler men tez tutanatyn zattardan keminde 20 metr qashyqtyqta ornatýǵa bolady. Ony bastyrmalardyń astynda, aǵashtardyń astynda jáne qatty jel kezinde qoldanýǵa tyıym salynady. Fıtıldi alystan qoldy sozyp tutatyp, oǵan eńkeımeı jáne betke tym jaqyndatpaı jaǵý kerek, sondaı-aq pırotehnıka janynda temeki shegýge bolmaıdy. Salıýttar men feıerverkterdi adamdar men janýarlar baǵytyna baǵyttaýǵa, sondaı-aq janyp turǵan buıymdarǵa 15 metrden jaqyn barýǵa tyıym salynady. Pırotehnıkalyq buıymdardy tek 18 jasqa tolǵan tulǵalar ǵana qoldana alady. Balalarǵa mundaı buıymdardy qolyna berýge jáne olardy qaraýsyz qaldyrýǵa bolmaıdy. Sonymen qatar kózge kórinetin aqaýlary bar buıymdardy qoldanýǵa nemese olardy bólshekteýge jol berilmeıdi, — dep atap ótti maman.

Ótken jyly órt sóndirý qyzmetkerleri pırotehnıkalyq ónimderdi zańsyz satýdyń 147 deregin anyqtaǵan. Eń kóp zańbuzýshylyqtar Taraz qalasynda, sondaı-aq Qordaı, Shý jáne Merki aýdandarynda tirkelgen.

Aıta ketsek, jýyrda Túrkistan oblysynda pırotehnıkany durys paıdalanbaý saldarynan eki bala jaraqat aldy. 

Al tilshimiz Jańa jyl kezinde qaı jerlerde pırotehnıka qoldanýǵa tyıym salynatynyn jazdy.