Tarazda Denıs Tenniń sýreti salynǵan banner ornatyldy

TARAZ. QazAqparat - Taraz qalasyndaǵy «Jeńis» saıabaǵynda Denıs Tenniń sýreti beınelengen banner ornatyldy. Sportshyǵa qurmet kórsetip, eske alǵysy kelgender osynda kelip, shyraq jaǵyp, gúl shoqtaryn qoıa alady, dep habarlaıdy QazAqparat tilshisi.

Ataqty qazaqstandyq mánerlep syrǵanaýshy, mıllıondaǵan halyqtyń súıiktisi Denıs Ten qapyda qaza tapqan kúnnen beri tarazdyqtar da kóppen birge qaıǵyrdy. Qala ortasyndaǵy Tóle bı eskertkishine gúl ákelip, shyraq jaqty.

Osyǵan oraı Jambyl oblysynyń ákimdigi Baýyrjan Momyshuly atyndaǵy «Jeńis» saıabaǵynda arnaıy banner ornatty.

«Biz halyq Denıs Tendi eske alý úshin arnaıy oryn belgiledik,-deıdi Jambyl oblysy ákimdigi ishki saıasat bóliminiń basshysy Berik Qurmanǵalı, - Qoǵam ókilderi, blogerler, jastar bizden osylaı ótindi. Naqty bir jerdi belgilep, jabdyqtap berýdi surady. Erteń Almatydaǵy marqummen qoshtasý rásimine oblys ákiminiń orynbasary Erqanat Manjýov pen oblystyq sport basqarmasynyń basshysy Nurbol Júnisbekov qatysady. Denıs óz eliniń naǵyz patrıoty edi, ol álemdik sport arenasynda Qazaqstannyń atyn shyǵarý úshin kóp eńbek sińirdi. Bul qaıǵyly oqıǵa halyqty eseńgiretip tastady jáne Denıs sııaqty asyl  azamattarymyzdy, talantty sportshylardy barynsha baǵalaý kerektigin esimizge saldy».   

Berik Qurmanǵalıdyń málimetinshe, Jambyl oblysynyń ákimi Asqar Myrzahmetov Denıs Tenniń otbasyna jedelhat joldap, ata-anasy men jaqyndaryna qaıǵyryp kóńil aıtqan.