Tarazda áskerı qyzmetshiler qoǵamdyq oryndardy dezınfektsııalaýǵa kiristi

TARAZ. QazAqparat – «Ońtústik» óńirlik qolbasshylyǵynyń áskerı qyzmetshileri qolbasshylyqtyń jaýapkershilik aımaǵyna kiretin Taraz qalasyndaǵy qoǵamdyq oryndardy dezınfektsııalyq óńdeýge kiristi, - dep habarlaıdy QazAqparat oblys ákiminiń baspasóz qyzmetine silteme jasap.

Taraz garnızonynyń eki júz elýden astam áskerı qyzmetshisi kún saıyn sanıtarlyq jumystardy júrgizýde. Buǵan deıin áskerı qyzmetshiler sanıtarlyq óńdeýden ótýge tıisti nysandardyń tizimi ázirlegen bolatyn. Olardyń qatarynda «Mart» jáne «Small» saýda ortalyqtary, «Aýyl Bereke», «Qaıqarmet» bazarlary, Temirjol beketi, áýejaı, avtobeket jáne qalanyń basqa da adam kóp jınalatyn oryndary bar.

Dezınfektsııalaý búrký jáne sýarý ádisterimen júrgiziledi. Ol úshin «Rýbej» hlor eritindisi paıdalanylady. Atalǵan eritindi vırýsqa tosqaýyl qoıýǵa, ony belgilengen shepten ári asyryp almaýǵa baǵyttalǵan.

Jeke saqtyq sharalaryn ustaný – áskerılerge qoıylyp otyrǵan basty talaptardyń biri. Bul oraıda olar terige dezınfektsııalyq eritindiniń túsýin boldyrmaý úshin kombınezonǵa uqsas jalpy áskerı qorǵanys jabdyqtarymen jáne betperdemen qamtamasyz etilgen.

«Rýbej» eritindisin sebý normasy ár sharshy metrge 1,5-2 lıtrdi quraıdy. Kanıstrdi únemi tolyqtyryp otyrý úshin ár óńdeý ýchaskesine arnaıy «ARS-14» - avtomattandyrylǵan quıý stantsııasy bólingen. Ol kúnde tańerten kerekti mólsherde dezınfektsııalyq eritindimen qamtylyp otyrady.

Qaladaǵy nysandardy sanıtarlyq óńdeý boıynsha áskerı jumystarǵa «Ońtústik» óńirlik qolbasshylyǵynyń radıatsııalyq, hımııalyq jáne bıologııalyq qorǵaý áskerleriniń bastyǵy, maıor Muhtar Sataev basshylyq jasaýda. Ol dezınfektsııalyq jumystardy júrgizýge tartylǵan áskerı qyzmetshilerdiń joǵary jaýyngerlik belsendiligin atap ótti.

«Bizdiń áskerıler qalany sanıtarlyq óńdeý boıynsha tapsyrmalardyń jaýapkershiligin sezinedi, vırýstyń taralýyn boldyrmaý úshin kún saıyn kezekshilikke daıyn. Biraq biz bir áskerı qyzmetshiler dezınfektsııalaýdy úzdiksiz jalǵastyrýy úshin keste ázirledik»,– dep atap ótti maıor M.Sataev.

«Bul bizdiń áskerı boryshymyz. Biz azamattarǵa qamqorlyq jasaýǵa jáne olardy qorǵaýǵa, elimizdiń ıgiligi úshin qoldan kelgenniń bárin jasaýǵa daıynbyz», - deıdi 85395 áskerı bóliminiń radıatsııalyq, hımııalyq jáne bıologııalyq qorǵaý vzvodynyń komandıri, leıtenant Nursultan Tálipbaev.