Tarazda alǵashqy qar jaýdy
ASTANA. KAZINFORM — Jambyl oblysynyń basym bóliginde kún sýytyp, jaýyn-shashyn jaýdy.
Óńirge bıyl alǵashqy qar belgilengen merzimnen bir aıdan astam ýaqyt buryn tústi.
Qala turǵyndary 1 qazannyń ózinde kúnniń kúrt sýytqanyn sezindi. Kúndizgi temperatýra + 3-5°C shamasynda boldy, jaýyn-shashyn boldy. Bul sınoptıkter úshin kútpegen jaǵdaı edi, bir kún buryn taratylǵan boljamda tek jańbyr jaýatyny aıtylǵan, degenmen «Qazgıdromet» kún raıynyń buzylatyny týraly eskertý jasaǵan.
— Oblystyń taýly aımaqtarynda túnde nóser bolyp, burshaq jaýyp, ekpindi jel soǵady. Kún kúrkirep, keı jerlerde tuman túsýi múmkin. Soltústik-batystan soǵatyn jeldiń ekpini 15-20 m/s jetedi, — dep habarlady vedomstvo.
Qar ushqyny áli dymqyl jerge tıgen boıda erip, sýǵa aınalyp jatyr. Biraq alǵashqy qardyń jaýǵany nazardan tys qalǵan joq — turǵyndar áleýmettik jelide sýretterimen bólisip, qazanda kútpegen kún raıyna qýanyshyn bildirip otyr.
Alaıda oblystyń soltústik jáne soltústik-batys aýdandarda qar jaýǵan joq. Ol jaqta kún jylyraq — Sarysý men Moıynqum aýdandarynda termometr +8°C, al Qarataýda +5°C shamasynda.
Buǵan deıin Jambyl oblysynda qazan aıynda kún raıy qandaı bolatynyn jazǵan edik.
Al elimizdegi jeti oblystyń júrgizýshilerine aýa raıynyń nasharlaýyna baılanysty eskertý jasaldy.