Tanymal óner juldyzdary saılaýda daýys berdi
Óner juldyzdarynyń saıası belsendiligi Instagram paraqshasynan baıqaldy.
Atap aıtqanda, belgili ánshi Altynaı Jorabaeva Nur-Sultan qalasyndaǵy saılaý ýchaskesine baryp, óz tańdaýyn jasaǵanyn paraqshasynda jazdy.
«Men óz tańdaýymdy jasadym, eldiń turaqtylyǵy men bereke-birligi úshin, eldiń amandyǵy men tynyshtyǵy úshin! Meniń tańdaýym - turaqty Qazaqstan jáne údemeli damý» dep jazdy ánshi.
Al, opera ánshisi, jaqynda Shymkent qalasyndaǵy Opera jáne balet teatry basshysy bop barǵan Maıra Muhamedqyzy da saılaý ýchaskesine baryp daýys bergeni jaıly jazba jarııalaǵan.
«Al qurmetti Shymkent qalasynyń turǵyndary! Sizderdi búgingi ótip jatqan saı̆laý naýqanyna qatysyp óz azamattyq mindetińizben daýsyńyzdy saı̆laýǵa qatysqan úmitkerlerge berýge shaqyramyn. Maǵan tileýshi bolǵan halqyma myń alǵys. Jumysymdy bastap kettim», - dedi ol jazbasynda.
Ánshi, MýzArt tobynyń múshesi Sáken Maıǵazıev te 74 jastaǵy anasymen birge Shymkent qalasyndaǵy saılaý ýchaskesinde bolǵan.
«Qazaq elin bir Alla qoldasyn! Men óz tańdaýymdy jasadym», - dep jazdy ol.
Ánshi Baǵlan Ábdiraıymov ta búgin Almatyda daýys bergenin habarlady.
«Saı̆laý 2021 jyl. Azamattyq boryshymdy ótedim. Partııalarǵa sáttilik! Saı̆laýǵa kelińizder», - dedi ol.
Belgili ánshi Marjan Arapbaeva da saıası naýqannan tys qalǵan joq.
«Men saılaýǵa baryp,óz tańdaýymmen daýys berip qaıttym! Elimizdiń jarqyn bolashaǵy úshin, talmaı qyzmet etip, naǵyz Otanymyzdyń patrıoty bolaıyq!!!», - degen ánshi otandastaryn daýys berýge shaqyrdy.
Belgili akter, teatr basshysy Ádil Ahmetov te azamattyq boryshyn ótegenin jazdy.
«Búgin - memleketimiz úshin tarıhı kún. Saılaýǵa baryp óz tańdaýymdy jasadym. Durys tańdaý jasaǵanyma senimdimin», - deıdi akter.
Ánshi Alma Amanjolova Almatydaǵy saılaý ýchaskesinde bolǵanyn jarııalady.
«Alataý aýdanynyń halqy saılaýǵa belsendi qatysýda. Men óz daýsymdy berdim. Bolashaǵymyz jarqyn bolsyn!», - dedi ol.
Ánshi Dosymjan Tańatarov Qazaqstannyń damýy úshin tańdaý jasaǵanyn jazdy.
«Eldiń amandyǵy men tynyshtyǵy úshin! Meniń tańdaýym turaqty Qazaqstan jáne údemeli damý! Qıyndyqty eńserip, jeńiske birge jetemiz!»,- dedi Dosymjan Tańatarov.
Belgili ánshi Serikbol Saılaýbek te daýys berý úshin saılaý ýchaskesine at basyn burǵan.
«Assalaýmaǵaleıkúm, qazaǵym! Men daýys berdim. Elimiz aman jurtymyz tynysh bolsyn!»,- dep jazdy ánshi.
Aktrısa, ánshi Aıgúl Imanbaeva da azamattyq belsendiligin tanytyp, saılaý ýchaskesine barǵan.
«Qaıyrly tań Qazaq eli! En dalada erkin ósken elimiz aman bolsyn. Men óz tańdaýymdy jasadym»,- deıdi ol.
Aıta ketý kerek, 10 qańtarda QR Parlamenti Májilisi men Máslıhat depýtattaryn saılaý bastaldy.
Almatyda 507 saılaý ýchaskesi tańǵy 07:00-den bastap ashyldy. Daýys berý oryndary «QR Saılaý týraly» zańynyń, Ortalyq saılaý komıssııasynyń talaptaryna saı keledi.
507 ýchaskede 2535 medıtsınalyq qyzmetker: 1014 dáriger, 1521 medbıke jumys isteıdi. Odan bólek keıbir saılaý ýchaskeleriniń janynda jedel járdem kezekshilik etedi.
Saılaýshylar maskamen kelýge mindetteledi. Eger joq bolsa olarǵa kireberiste maska beriledi. Eger onyń dene qyzýy joǵary bolsa, daýys berýge tyıym salynady.
Daýys berýshi óz ýchaskesin 221-10-01 koll ortalyǵy arqyly tegin bile alady nemese @sailau_almaty Telegram-bot kómegimen, sondaı-aq «Open Almaty» servıs ortalyǵynda jáne service.almaty.kz saıtynan bile alady.
Májilis saılaýyna 5 saıası partııa túsip jatyr:
«Aýyl» halyqtyq demokratııalyq partııasy; «Nur Otan» partııasy; «ADAL» saıası partııasy; «Aq jol» Qazaqstan demokratııalyq partııasy; Qazaqstan halyq partııasy. Bul partııalar ár deńgeıdegi Máslıhat depýtattyǵyna da óz úmitkerlerin shyǵardy.
