Tanymal DJ Bozjyra shatqalynda beınebaıan túsirdi

AQTAÝ. QazAqparat - DJ Azi Ray laqap atymen tanymal Azıza óziniń jańa týyndysyn Mańǵystaý oblysyndaǵy Bozjyra shatqalynda oryndady. Áleýmettik jeli qoldanýshylary mýzykalyq týyndymen qatar, beınebaıandaǵy ásem tabıǵatqa erekshe tamsanyp jatyr, dep habarlaıdy QazAqparat tilshisi.

Azıza Mańǵystaý oblysynda túsirilgen «Silk Sound» atty beınerolıgin Instagram jelisindegi paraqshasynda jarııalady. Ol óziniń jazbasynda mundaı formattaǵy vıdeony birinshi ret túsirgenin aıtqan.

«Óte ásem tabıǵat, erekshe jer. Ózimniń búkil sezimimdi mýzyka arqyly jetkizgim keldi. Sizder de sol sezimdi sezinesizder degen oıdamyn», - dedi ol.

Al, áleýmettik jeli qoldanýshylary áýenniń uıaly telefon rıngtonyna uqsaıtynyn jazǵan.

Mańǵystaý oblysy týrızm basqarmasynyń basshysy Máýlen Ǵabdýlqalıev jańa rolıktiń aımaq týrızmin damytýǵa úles qosatyn jańa qadam ekenin aıtady.

«Instagram jelisinde kúndelikti qaralym jınap jatqan DJ Azi Ray laqap atymen tanymal Azızanyń beınerolıginde Bozjyra shatqaly kópshiliktiń nazaryna ilingeni sózsiz. Sondyqtan da, mundaı vıdeolar, klıpter týrızm salasyn damytýǵa paıdaly», - dedi ol.

Osy oraıda, basqarma basshysy óńirimizdiń ońtústik jáne soltústik baǵytynda 200-ge jýyq tarıhı-mádenı oryn bar ekenin aıtyp ótti.

«Saıahatshylar kóbine túbektiń ońtústik betkeıine saıahat jasaıdy, ıaǵnı týrıster «Beket ata» jerasty meshiti men Bozjyra shatqalynyń tumsa tabıǵatyn kórýge arnaıy nıet etip barady. Jalpy, óńirde 13 myńnan astam tarıhı-mádenı, ólketaný eskertkishteri bar, ıaǵnı mádenıet salasyna bizdiń týrıstik nysandardyń qosar úlesi mol», - dedi Máýlen Ǵabdýlqalıev.