Tanymal dıktor Ábdiráli Bólebaı ómirden ozdy

NUR-SULTAN. QazAqparat – Radıo jáne televızııa salasynyń ardageri, belgili dıktor Ábdiráli Bólebaı 70 jasqa qaraǵan shaǵynda dúnıeden ótti, dep habarlaıdy QazAqparat tilshisi Qazaq radıosyna silteme jasap.

Ábdiráli Bólebaı Jambyl oblysy Jambyl aýdanynyń Ernazar aýylynda dúnıege kelgen.

Almatydaǵy №46 qalalyq kásiptik tehnıkalyq ýchılışeni, Qurmanǵazy atyndaǵy konservatorııany bitirgen.

Eńbek jolyn «Qazaqfılm» kınostýdııasynda rejısserdyń kómekshisi bolyp bastaǵan.

Qazaq radıosynda, Qazaq teledıdarynda dıktor, dıktorlar tobynyń jetekshisi, «Habar» agenttiginde «Jeti kún» aqparatty saraptaý baǵdarlamasynyń jáne «Jańalyqtar» qyzmetiniń júrgizýshisi, «Qazaqstan» ulttyq arnasy Astana fılıalynyń dıktory, QR Prezıdenti Teleradıokesheniniń prodıýseri, QR Ekonomıkalyq qylmysqa jáne sybaılas jemkorlyqqa qarsy kúres agenttiginiń (qarjy polıtsııasy) baspasóz hatshysy bolyp qyzmet atqardy.

Belgili dıktor ómiriniń sońyna deıin Qazaq radıosynda dıktorlyq qyzmet etti.

Ol teleradıoda dıktorlyq ónerdiń qyr-syryn tereń meńgergen, daýys úni ózgeshe, sheberligi tolysqan bilikti maman boldy.

«Onyń oqyǵan teleradıohabarlarynan ózgeshe bir tynys, keń aýqym, bııazylyq pen parasattylyq lebi esedi. Júzi jyly, jaıdarly, qarapaıym. Bul teńeý Qazaq televızııasy men radıosy tarıhynan oıyp turyp oryn alǵan Ábdiráli Bólebaı týraly aıtylǵan. Kez kelgen aqparattyń shyraıyn shyǵaryp oqıtyn Ábdiráli aǵamyzdyń beınesi kózi qaraqty kórermenniń jadynda máńgi qalary sózsiz. Ábdiráli aǵamyzdyń altyn daýysy Qazaq radıosynyń «Altyn qorynda» saqtaýly», - dep atap ótedi radıodan.