Tanymal zerger Táýelsizdik kúnine kórme ótkizdi
ASTANA. KAZINFORM — Táýelsizdik kúni qarsańynda Prezıdent ortalyǵynda qazaq zergerlik óneriniń kórmesi ashyldy. Onda tanymal zerger, restavrator, kollektsıoner Berik Álibaıdyń úzdik jınaǵy qoıyldy. Bir aı boıy Astana turǵyndary men qonaqtary 250-den astam kúmis áshekeılerdi, turmystyq buıymdar men ulttyq kıimderdi tamashalaı alady.
Karl Faberje ordeniniń ıesi, Musylman áleminiń eń úzdik zergeri atanǵan sheber Iordanııa, Frantsııanyń birinshi hanymdaryna qazaqtyń boıtumaryn jasaǵan edi. Bul ulttyq áshekeıimizdiń álemge tanylyp, suranystyń artýyna yqpal etti.
— Búgingi kórme «Jelisi úzilmegen jalǵastyq» dep atalady. Meniń atam da, ákem de zerger bolǵan. Ózim 30 jylǵa jýyq ýaqyt elimizdiń memlekettik mýzeılerinde qyzmet ettim, sonda halyq arasynan tabylǵan buıymdardy jınadym, óz úıimnen mýzeı ashtym. Osylaısha, ata-babalarymyzdan qalǵan buıymdardan bastap, ózimniń birneshe jyl jasaǵan shyǵarmashylyq jumystarym Táýelsizdik qarsańyndaǵy kórmege qoıylyp otyr. Óıtkeni Táýelsizdikten asqan uly mereke joq, — deıdi tanymal zerger.
Kórme ekspozıtsııasynda 250-den astam kúmis áshekeı buıym usynylǵan. Olar oıý-órnektiń maǵynalyq mazmunyn, kıeli jáne estetıkalyq erekshelikterin baıandaıdy. Ekspozıtsııa arqyly kórermen kúmistiń erekshe kúshi men tazalyǵyn, onyń ulttyq mádenıettegi mańyzdy ornyn sezine alady.
Avtordyń zergerlik buıymdary men kórkem týyndylary dástúrli qazaq naqyshtary men zamanaýı dızaınerlik sheshimderdiń úılesimin tapqan biregeı stılimen erekshelenedi.
— Ásirese áıel áshekeıleri, qarý-jaraqtar, asyl tastardan jasalǵan músinder qoıyldy. Bizdiń beldikter, óńirjıekter, bilezikter, qudaǵı júzikter halqymyzdyń tereń mádenıetin kórsetedi. HH ǵasyrda Keńes odaǵy tusynda zergerlik salada toqyraý boldy. 90-jyldary zergerlik qaıta jandandy. Biz – Táýelsizdiktiń alǵashqy qarlyǵashtarymyz. Dúnıe júzinde zergerlik ónerden eń aldyńǵy oryndamyz desem de bolady. Biz kóp konkýrstarǵa, festıvalderge baramyz, sonda bizdiń áshekeıler kólemdigimen, ádemiligmen, jasalý tehnıkasymen aldyńǵy qatarda turady, — deıdi B.Álibaı.
Aıta keteıik, 2016 jyly Iordanııa Táýelsizdiginiń 70 jyldyǵyna arnalǵan sharada memleket patshaıymy Ranııa ál-Abdýlla qazaq boıtumaryn taǵyp shyqqan edi. Áshekeıdi jasaǵan zerger, restavrator Berik Álibaı 9 jyl burynǵy oqıǵanyń qalaı bolǵanyn aıtyp berdi.
