Tanymal aktrısa Mıshel Trahtenberg qaıtys boldy

ASTANA. KAZINFORM — Tanymal amerıkalyq aktrısa Mıshel Trahtenberg 26 aqpan kúni Nıý-Iorktegi óz úıinde qaıtys boldy. Bul týraly NBC polıtsııa málimetterine silteme jasap habarlady. 

Nıý-Iork polıtsııa departamentiniń habarlaýynsha, tańǵy saǵat 08:00 shamasynda tótenshe qyzmetke qońyraý túsken. Oqıǵa ornyna jetken polıtsııa qyzmetkerleri 39 jastaǵy áıeldiń es-tússiz jatqanyn anyqtaǵan.

Dárigerler aktrısanyń ómirden ótkenin rastady. Polıtsııa qyzmetkerleri qasaqana kisi óltirý nusqasyn joqqa shyǵardy. 

Ólimniń naqty sebebin anyqtaý úshin Nıý-Iork sot-medıtsınalyq sarapshylary tergeý júrgizip jatyr.

Mıshel Trahtenberg kórermenge «Gossip Girl» («Ósekshi qyz») jáne «Buffy the Vampire Slayer» («Vampır óltirýshi Baffı») serıaldaryndaǵy rólderimen tanymal.

Eske sala keteıik, buǵan deıin Sýdanda áskerı ushaq apatqa ushyraǵanyn habarlaǵan edik.