Tamshylatyp sýarý tehnologııalaryn ózimizde shyǵarýymyz qajet – Úkimet basshysy
ASTANA. KAZINORM – Fermerlerdiń sý únemdeý tehnologııalaryn satyp alýǵa jumsaǵan shyǵynynyń 80 paıyzy sýbsıdııalanbaq. Bul týraly búgin Úkimet otyrysynda Premer-Mınıstr Álıhan Smaıylov aıtty.
«Sýdy tıimdi paıdalaný asa mańyzdy mindetterdiń biri. Osy rette biz sý resýrstarynyń tapshylyǵy jaǵdaıynda biraz jumys atqarýymyz kerek. Usynylyp otyrǵan tujyrymdama osy baǵyttaǵy negizgi baǵdarlamalyq qujat bolady. Ony iske asyrý sý resýrstaryn monıtorıngileý men boljaýdyń naqty júıesin jolǵa qoıýǵa yqpal etedi. Bul júıe sý qaýipsizdigin qamtamasyz etý turǵysynan óte qajet», — dedi Premer-Mınıstr.
Úkimet basshysynyń atap ótýinshe, tujyrymdamanyń mańyzdy baǵyty — sý sharýashylyǵyna qajetti ınfraqurylymdy salý jáne rekonstrýktsııalaý.
«Kóp jyldar boıy olardy kútip ustaýǵa tıisti kóńil bólinbeı keldi. Mysaly, Ortalyq Qazaqstan men Astananyń basty sý arnasy Qanysh Sátbaev atyndaǵy kanalda sorǵy stantsııalary jumysynyń tıimdiligi nebári — 30 paıyz. Úlken Almaty kanaly paıdalanýǵa berilgen kezden bastap 40 jyl boıy jóndeý júrgizilmegen. Túrkistan, Qyzylorda, Jambyl oblystarynda magıstraldyq jáne sharýashylyq aralyq arnalardyń kópshiligi tozǵan. Nátıjesinde 40 paıyz sý ysyrap bolýda», — dedi Álıhan Smaıylov.
Ol tujyrymdamanyń taǵy bir mańyzdy baǵyty sý únemdeýdi yntalandyrý ekendigine toqtaldy.
«Sý tapshylyǵynda jáne sýdy tutynýdyń artýy kezinde, eń aldymen, sý shyǵynyn azaıtý men ony uqypty paıdalaný óte mańyzdy. Biz qazir fermerlerge sý berý qunyn sýbsıdııalap otyrmyz. Sondaı-aq sý únemdeý tehnologııalaryn satyp alýǵa jumsalǵan shyǵynnyń 50 paıyzyn óteımiz. Bıyl bul mejeni 80 paıyzǵa deıin kóterý josparlanýda», — dedi Úkimet basshysy.
Degenmen, Premer-Mınıstrdiń aıtýynsha, júrgizilip jatqan jumystarǵa qaramastan, elimizde sý únemdeý júıelerin engizý úlesi tómen deńgeıde qalyp otyr.
«Mysaly, tamshylatyp sýarý júıesin qoldaný 312 myń gektarda josparlanǵan. Al qazir ol 84 myń gektarda ǵana qoldanylady. Tehnologııalar quny qymbat. Oǵan dıqandardyń kópshiliginiń shamasy jetpeıdi. Sondyqtan olardy ózimizde shyǵarýdy qolǵa alý kerek. Mundaı jobalar qazirdiń ózinde talqylanýda. Olardy iske asyrýymyz qajet», — dedi Álıhan Smaıylov.
