Tamara Dúısenova Mańǵystaý oblysynyń bilim berý nysandaryn aralady

AQTAÝ. KAZINFORM – Qazaqstan Respýblıkasy Premer-mınıstriniń orynbasary Tamara Dúısenova Mańǵystaý oblysyna jumys sapary aıasynda óńirdegi bilim berý júıesiniń damý barysymen tanysty.

Bilim berý sapasyn arttyrý maqsatynda óńirde tirek mektepter jelisin qurýǵa kóńil bólinedi. Sonymen qatar, Mańǵystaý oblysynda «Otpan» jobasy bastaldy. Ony iske asyrýǵa bilim berý salasyn turaqty damytý qorymen qatar óńirdiń iri kompanııalary qatarynan demeýshiler qatysady. Nazarbaev Zııatkerlik mektepteri men «Bilim-Innovatsııa» lıtseı-ınternattary jobaǵa qatysý úshin iriktelgen 50 mekteptiń ozyq tájirıbesin jáne ádistemelerin bólisedi.

NCOC, «QazMunaıGaz» AQ jáne «Halyq» jeke qaıyrymdylyq qory mektepterdi jaraqtandyrýǵa qoldaý kórsetti. Demeýshiler qatarynda 60 oqý synybyn jaraqtandyrýǵa qatysqan «Ordabasy Group» kompanııasy bar.

«Otpan syndy jobalardy qoldaý arqyly, biz erteńgi kúnniń mindetterin sheshýge qabiletti bilikti mamandardy tárbıeleý úshin qolaıly jaǵdaılardy jasaımyz. Bilim berý mekemelerin jańǵyrtý jáne pedagogtardyń biliktiligin arttyrý bizdiń balalarymyzǵa eń jaqsy bilim berý resýrstaryna qoljetimdilikti qamtamasyz etedi. Biz osy bastamanyń bir bóligi bolýǵa jáne Qazaqstannyń zııatkerlik kapıtalyn damytýǵa úles qosýǵa qýanyshtymyz», — dedi «Ordabasy Group» kompanııasy basqarma tóraǵasynyń keńesshisi Jarmuhamed Appaz.

Sonymen qatar Tamara Dúısenova Aqtaýdaǵy «Otpan» jobasyna engizilgen eki mekteptiń qyzmetimen tanysty. Onyń sheńberinde №15 jáne 29 mektepterde materıaldyq-tehnıkalyq baza kúsheıtildi. Muǵalimder úshin olarda ártúrli taqyryptyq kýrstar men semınarlar uıymdastyrylady.

«Oblys ákimdigi mektepterdiń jóndeýine jaýapty boldy. Al demeýshiler pándik kabınetterdi jabdyqtady. «Otpan» jobasy mundaǵy ustazdarǵa, oqýshylarǵa sapaly bilim berý isin uıymdastyrýda jaqsy múmindikter týǵyzyp jatyr. Bul bilim oshaqtary keıin ózge de orta bilim mektepteri úshin tirek mekemeleri bolmaq», — dep atap ótti Tamara Dúısenova.

Oqýshylardyń ata-analary da kabınetterdi jabdyqtaýǵa qarajat bólgen demeýshilerge alǵystaryn bildirdi. Sapar aıasynda óńir mektepteri basshylarynyń qatysýymen keńes uıymdastyryldy. Oǵan óńir basshysy Nurdáýlet Qılybaı qatysty. Kezdesý barysynda óńirdegi orta bilim berýdi damytý máseleleri talqylandy.

Jumys sapary barysynda Tamara Dúısenova oblys ortalyǵyndaǵy «Balbulaq» balabaqshasy jumysymen tanysty. 300-den astam bala oqıtyn mekemede Montessorı, logoped, psıholog kabınetteri bar. Balabaqshada mektepke deıingi bilim berý máseleleri boıynsha keńes ótti.

Óńirde bastaýysh mektep pen balabaqsha baǵdarlamalaryn sınhrondaý jumystary jalǵasýda. Mektepke deıingi bilim berý mekemelerimen qamtylmaǵan balalardyń ata-analary úshin konsýltatsııalyq ortalyqtar jumys isteıdi. Bul jumys Mańǵystaý oblysynyń 169 balabaqshasynda júrgizilýde.

Mektepke deıingi bilim berý mekemelerin tsıfrlandyrý da basty nazarda. Kezdesý barysynda Taraz qalasynda pılottyq rejımde iske asyrylatyn qarjylandyrýdyń vaýcherlik ádisin engizý nátıjeleri tanystyryldy. Atalǵan júıe talaptarǵa saı keletin barlyq balabaqshalardy bıýdjettik qarjylandyrýǵa jol ashty. Ata-analar mektepke deıingi bilim berýdi uıymdastyrýdy tańdaýǵa múmkindik aldy, ashyqtyq esebinen bıýdjet qarajatyn únemdeý júrip jatyr.

«Júıe óziniń tıimdiligin kórsetip otyr. Vaýcherlik qarjylandyrý ádisi Shymkent jáne Túrkistan qalalarynda engizilýde. Ata-analar men balalardyń múddelerine saı keletin júıe barlyq óńirlerde engizilýi tıis», — dedi Tamara Dúısenova.

Memleket basshysy keler jyldy jumysshy mamandyqtary jyly dep jarııalaǵan bolatyn. Osy oraıda eldegi tehnıkalyq jáne kásiptik bilim berý salasyn transformatsııalaý mindeti tur. Qazirde kolledjderdi beıindeý jumysy júrgizilýde. Negizgi maqsat kásiptik bilim berý nysandaryn eń aldymen óńirlerdiń suranysyna qajetti kadrlardy daıarlaý ornyna aınaldyrý.

Jumys sapary aıasynda vıtse-premer Mańǵystaý týrızm kolledjine bardy, onda dýaldy oqytý jobasyn paıdalana otyryp, qyzmet kórsetý salasyna mamandar daıarlanady. Kolledj túlekterge jumysqa ornalasý úshin jaǵdaı jasaı otyryp, iri kásiporyndarmen, jergilikti jáne sheteldik qonaqúılermen belsendi jumys isteıdi.

Kolledj bazasynda oqý oryndary basshylarynyń qatysýymen tehnıkalyq jáne kásiptik bilim berý salasyna qatysty máseleler talqylandy. Qazirgi ýaqytta kadrlardy daıarlaýdy 26 oqý orny júrgizedi. Túlekterdiń jumyspen qamtylý kórsetkishi 72 paıyzǵa jýyqtaıdy. Oblystaǵy tirek kolledjderi aıqandalyp, ózara tájirıbe almasý isi qolǵa alynǵan.

«Tehnıkalyq jáne kásiptik bilim berý baǵytynda birqatar sharalar qolǵa alyndy. Kolledjderdiń jumys sapasyna qatysty baǵalaý júrgizilip, olardy lıgalarǵa jikteý qarastyrylǵan. Oqý protsesine halyqaralyq standarttardy engizý qajet. Bul daıyndalatyn mamandardyń básekege qabilettiligin arttyrý úshin kerek. Halyqaralyq salalyq standarttardy engizgen, túlekterdiń basym bóligi sertıfıkattalǵan jáne ortasha eseppen joǵary mólsherde eńbekaqy alatyn kolledjderge yntalandyrýshy tólemder qarastyrylatyn bolady», — dedi Tamara Dúısenova.

Jumys sapary aıasynda Tamara Dúısenova Aqtaý halyqaralyq mektebine (AIS) bardy. Qazir onda 420 oqýshy oqıdy. Oqytýshylardyń 80%-y elimizdiń ártúrli aımaqtarynan kelgen joǵary bilikti pedagogtar. Sondaı-aq 5 sheteldik maman tartyldy.

Oblysta «Jaıly mektep» ulttyq jobasy aıasynda 12 600 oryndyq 13 orta oqý ornyn salý josparlanǵan. Jeltoqsan aıynda árqaısysy 1200 orynnan turatyn 3 nysan paıdalanýǵa beriledi. Qazir ǵımarattarda árleý jumystary júrgizilýde. Vıtse-premer qurylys barysymen tanysty. Tamara Dúısenova obektilerdi ýaqytyly tapsyrý úshin qurylys jumystarynyń merzimi men sapasyn muqııat baqylaýdy tapsyrdy.