Tamara Dúısenova: Qazaqstanda 560 myń adamǵa zeınetaqy jarnalary aýdaryla bastady
Bul jaıly Úkimette ótken baspasóz máslıhatynda QR Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy «QazAqparat» HAA tilshisi.
«Nátıjeli jáne nátıjesiz ózin-ózi jumyspen qamtyǵan azamattar týraly aıtaıyn. Statıstıkanyń ádistemesine sáıkes, eger de azamattar ózderiniń taýaryn satyp, odan alatyn tabysy kúnkóris deńgeıinen joǵary bolatyn bolsa, onda olar nátıjeli jumyspen qamtylǵan azamattar dep aıtylady. Olardyń kóbi qazir kásipker retinde tirkelip otyr. Al eger aýylda bir sıyry, 4-5 taýyǵy barlar nátıjesiz óz-ózin jumyspen qamtyǵan azamattar bolyp tabylady. Sol qatardaǵy azamattardy jumyspen qamtý máselesin sońǵy 5 jyldyń ishinde aınalysyp kelemiz», - deıdi Tamara Dúısenova.
Mınıstrdiń aıtýyna qaraǵanda, búgingi Úkimet otyrysynda «nátıjesiz ózin-ózi jumyspen qamtyǵan azamattardy jumysqa tartý» máselesi qarastyrylǵan.
«Jańa aıtqanymdaı, biz bul jumysty 2016 jyldyń jeltoqsan aıynan bastadyq. Mindetti áleýmettik medıtsınalyq saqtandyrý júıesin engizýge baılanysty barlyq azamattardyń mártebesin qarap shyqtyq. Kim zeınetker? Kim stýdent? Kim kópbalaly ana? Biz MÁMS zańyn engizgen kezde «10 mıllıonǵa jýyq adamnyń saqtandyrylýyn memleket qamtamasyz etedi» dep aıtqan bolatynbyz. Ol azamattardyń barlyǵy anyqtaldy», - deıdi ol.
Tamara Dúısenova sonymen birge, ózin-ózi jumyspen qamtyǵan azamattardyń mártebesin tekserý kezinde bazalarda 5,7 mıllıon azamattyń Qazaqstanda tursa da, eshqandaı mártebesi belgilenbegeni anyqtalǵanyn aıtady.
«ıAǵnı, olar ne jumys isteıtin adamdardyń qatarynda, ne stýdentterdiń nemese áleýmettik tólem alatyn azamattardyń qatarynan tabylmady. Sondyqtan, oblys ákimderimen birge ótken jylǵy sáýir aıynan tamyz aıynyń arasynda barlyq eldimekenderde úıdi-úıdi aralap, saýalnama júrgizildi, túsiniktemeler alyndy. Sonyń arqasynda 5,7 mıllıon azamattyń 3 mıllıonynyń tolyq mártebesi anyqtaldy. Olardyń ishinen shette oqıtyn stýdentter de, shetelge kóship ketkender men qaıtyp kelgenderdiń bári bar bolyp shyqty», - deıdi mınıstr.
Ol sondaı-aq, Qazaqstanda 1,2 mıllıon azamat «jumys isteımiz» dep málimet bergenin atap ótti.
«Olardyń kóbi qyzmet kórsetý salasynda eńbek etip júrgender. Biraq, ol kisilerdiń zeınetaqylyq jarnalary joq boldy. Sondyqtan, jergilikti jerde oblys pen aýdan ákimderi, salyq organdarynyń qyzmetkerlerimen, ásirese jumys berýshilermen óte aýqymdy jumys atqaryldy. Osynyń nátıjesinde jumys istep júrgen 560 myń azamatqa zeınetaqy jarnasy tólene bastady. 54 myń kásipker qaıta tirkeldi», - deıdi Tamara Dúısenova.