Tamara Dúısenova áleýmettik-eńbek salasyn tsıfrlandyrýǵa baǵyttalǵan jobalardy atady

ASTANA. QazAqparat - Eńbek jáne halyqty áleýmettik qorǵaý mınıstrligi biryńǵaı aqparattyq júıesin tsıfrlyq tehnologııalar aıasynda damytý joldaryn qarastyrýda. Bul týraly búgin Úkimettiń selektorlyq rejimdegi otyrysynda atalǵan vedomstvonyń basshysy Tamara Dúısenova aıtty, dep habarlaıdy QazAqparat.

«Búgingi tańda bizdiń salanyń barlyq baǵyttaryn qamtıtyn biryńǵaı aqparattyq júıe jumys isteýde. Júıeniń negizi birinshiden, 14,5 mln azamattyń derekqory bolyp tabylady. Bul derekqor onlaın rejimde jańartylyp otyrady. Sondyqtan barlyq ýaqytta ózekti. Ekinshiden, azamattarǵa kórsetiletin barlyq qyzmet túri avtomattandyrylǵan. Bıyl 19 mln qyzmet kórsetildi. Sonyń ishinde 3,2 mln qyzmet elektrondy úkimet arqyly atqaryldy. Úshinshiden, áleýmettik qamsyzdandyrý salasyna qajetti qarajat kólemi jyl saıyn osy júıe aıasynda eseptelinedi. Búgingi kúni osy júıe arqyly ótetin tólem kólemi 3,5 trln teńgeden asyp otyr. Endigi kezekte júıeni tsıfrlyq tehnologııalar aıasynda damytý joldaryn qarastyrýdamyz»,  - dedi mınıstr.

Onyń aıtýynsha, áleýmettik-eńbek salasyn tsıfrlandyrýdy damytý baǵytynda birneshe joba júzege asyrylýda.

«Birinshi joba - bul biryńǵaı elektrondy eńbek bırjasy. Erterekte eńbek naryǵynyń qurylymy bólek-bólek bolatyn. Jumys izdeýshi birneshe jumys berýshini aralap shyǵatyn bolsa, al kásiporyn óte kóp nátıjesiz suhbattasýlardy ótkizip keletin. Sodan eki tarapta ýaqyt jáne qarjy shyǵyndaıtyn Memleket basshysynyń tapsyrmasyn oryndaý úshin aǵymdaǵy jyldyń qazan aıynan bastap elimizdiń 4 óńirinde biryńǵaı elektrondy eńbek bırjasy iske qosyldy», - dedi ol.

Tamara Dúısenovanyń sózine qaraǵanda, mınıstrlik qolǵa alǵan ekinshi joba eńbek kelisimsharttaryn elektrondy esepke alý dep atalady. Al úshinshi joba ózin-ózi jumyspen qamyǵandardy elektrondy tirkeýge baǵyttalǵan. Tórtinshi joba baqylaýdy uıymdastyrýǵa elektrondy ruqsat berýdi kózdeıdi.