Tamara Dúısenova Aqmola oblysyndaǵy bilim berý nysandaryna bardy
ASTANA. KAZINFORM - Aqmola oblysyna jumys sapary aıasynda QR Premer-Mınıstriniń orynbasary Tamara Dúısenova óńirdegi birqatar bilim berý mekemelerin aralady.
Joǵary oqý oryndary men kolledj stýdentteri úshin qolaıly jaǵdaı jasaý – Úkimettiń basym mindeti. Osyǵan baılanysty elimizde jataqhana qurylysy belsendi júrgizilýde. Osyndaı nysandardyń biri – Kókshetaý joǵary tehnıkalyq kolledji stýdentterine arnaıy salyndy. 300 oryndyq 5 qabatty ǵımaratta medıtsınalyq kabınet, stýdenttik bastamalar ortalyǵy, ınklıýzııa bólmesi qarastyrylǵan. Kolledj aımaqtaǵy eń ozyq oqý oryndarynyń biri bolyp sanalady. Munda Aqmola oblysynyń turǵyndary ǵana emes, elimizdiń basqa óńirlerinen kelgen jastar da bilim alýda. Mysaly, Mańǵystaý óńirinen 29 stýdent kelgen. Vıtse-premer stýdenttermen áńgimelesip, olarǵa oqýda tabys tiledi.
Jumys sapary barysynda vıtse-premer Krasnyı ıar aýlyndaǵy kópsalaly ınnovatsııalyq kolledjde boldy. Munda óńirdiń iri kompanııalarymen yntymaqtastyq qurylyp, dýaldy oqytý ádisi belsendi qoldanylady.
Oqý ornynyń jumysymen tanysqan Tamara Dúısenova TjKB júıesin damytý máseleleri jónindegi keńeske qatysty. Memleket basshysy halyqqa Joldaýynda 2025 jyldy jumysshy mamandyqtary jyly dep jarııalap, tehnıkalyq jáne kásiptik bilim berý júıesin reformalaýdy júzege asyrýdy tapsyrdy.
Osy tapsyrmany iske asyrý úshin Oqý-aǵartý mınıstrligi TjKB júıesin transformatsııalaýdyń keshendi josparyn ázirleýde. Kolledjderdi beıindeý boıynsha jumystar belsendi júrgizilýde. Óńirdiń eńbek naryǵynyń qajettiligin eskere otyryp, kadrlar daıarlaýdy Aqmola oblysynyń 29 kolledji júzege asyrady. Olardyń 8-i tirek kolledji retinde anyqtalǵan.
«TjKB uıymynyń jumys sapasyna qaraı olardy lıgalarǵa bóle otyryp, baǵalaý júrgiziletin bolady. Jan basyna shaqqandaǵy qarjylandyrý normatıvi de ózgertilmek. Halyqaralyq salalyq standarttardy engizgen, túlekterdiń basym bóligi sertıfıkattalǵan jáne ortasha jalaqysy joǵary kolledjder úshin yntalandyrý tólemderi beriletin bolady», — dep atap ótti Tamara Dúısenova.
Aqmola oblysyna jumys sapary aıasynda vıtse-premer óńirdegi alǵashqy erekshe qajettiligi bar balalarǵa arnalǵan balabaqshaǵa bardy. Munda 77 búldirshin kelip júr. Olar úshin dáriger, defektolog, psıholog, logoped kabınetteri, sondaı-aq dene-shynyqtyrý alańy qarastyrylǵan.
Balabaqsha bazasynda mektepke deıingi mekeme meńgerýshileriniń qatysýymen Mektepke deıingi bilim berý jáne tárbıe máseleleri boıynsha keńes ótti. Atap aıtqanda, balabaqshalardy jan basyna qarjylandyrý ádistemesi tanystyryldy. Bul tásil balalardy balabaqshalarǵa emes, jergilikti ákimdik bóletin vaýcherlerge kezekke qoıýdy kózdeıdi. Ata-analardyń ózderi talaptarǵa saı mektepke deıingi mekemeni tańdaıdy. Osylaısha, «Aqsha qyzmet alýshy sońynan» qaǵıdaty iske asyrylady. Ádis Tarazda synaqtan ótkizildi. Endi Shymkent jáne Túrkistan qalalarynda qoldanyla bastady.
«Memleket basshysy halyqqa Joldaýynda balalardy mektepke daıyndaý máselesine nazar aýdardy. Osyǵan baılanysty balabaqshalardyń bilim berý baǵdarlamalaryn mektepterdiń bastaýysh synyptarymen úndestirý protsesin jalǵastyrý qajet», — dedi vıtse-premer.
Óńirge jumys sapary aıasynda vıtse-premer ál-Farabı atyndaǵy ІT mektep-lıtseıine bardy. Munda bilim berý nysandarynyń jumysynda tsıfrlyq sheshimder usynyldy. Olar balalardyń qaýipsizdigin qamtamasyz etýge, mektep ashanalarynda tamaqtanýdy uıymdastyrýǵa baǵyttalǵan. Memleket basshysy kelesi jyldan bastap «áleýmettik ámııan» tetigin engizýdi tapsyrdy. Bul jumys óńirlerde belsendi júrgizilýde.
Bilim berý sapasyn arttyrýǵa erekshe kóńil bólinedi. Bul másele óńirdiń bilim berý uıymy basshylarynyń qatysýymen ótken keńeste talqylandy. Oblysta ádistemelik qoldaýdy qajet etetin 127 nysanaly mektep anyqtaldy. Olardyń kópshiligi shaǵyn jınaqtalǵan. Olarmen jumys kezeń-kezeńmen júrgiziletin bolady.
«Balabaqshalar, mektepter, kolledjder men joǵary oqý oryndarynda jeke tulǵany damytýdyń biryńǵaı, ózara sabaqtas, kóp deńgeıli júıesi bolý tıis. Osyǵan baılanysty óńirlerge oqý baǵdarlamalaryn sınhrondaý jáne jetildirý, pedagogterdiń biliktiligin arttyrý, qarjylandyrý máseleleri boıynsha naqty tapsyrmalar berildi. Bul baǵytta barlyq oblysta belsendi jumys júrgizilýde», — dep atap ótti Tamara Dúısenova.
