Tamaq berý, qujatyn jóndeý, jumysqa turǵyzý - Astanada kezbe adamdarǵa qandaı kómek kórsetiledi

ASTANA. KAZINFORM – Astana qalasy Jumyspen qamtý jáne áleýmettik qorǵaý basqarmasynyń basshysy Ilıa Skýb pen «Demeý» áleýmettik beıimdeý ortalyǵynyń dırektory Samat Topataev elordada turǵylyqty jeri joq kezbe adamdarǵa qalaı kómek kórsetiletinin baıandady. Kazinform agenttigi spıkerler usynǵan málimetter negizinde úısiz-kúısiz jandarǵa kórsetiletin qyzmet pen múmkindikterge sholý usynady.

Arnaıy beıimdeý ortalyǵy bar 

Belgili turaǵy joq adamdarǵa arnalǵan «Demeý» áleýmettik beıimdeý ortalyǵy 2001 jyldan beri jumys isteıdi jáne táýlik boıy ýaqytsha turýǵa (elordalyqtarǵa 1 jylǵa deıin, qaladan tys aýmaqtan kelgen adamdarǵa 30 kúntizbelik kúnge deıin) múmkindik beredi. Onda adamdar ózderiniń ótinishi boıynsha nemese Jumyspen qamtý jáne áleýmettik qorǵaý basqarmasy, Densaýlyq saqtaý basqarmasy, ishki ister organdarynyń baǵyttaýy boıynsha ornalasady.

Jyl saıyn shamamen 1200 qańǵybas adamǵa kómek kórsetiledi

Elordada sońǵy 3 jylda kezbe jandardyń sany kóp ózgermegen. 2022, 2023, 2024 jyldardaǵy derekter mynandaı:

Áleýmettik kómek	2022	2023	2024
Kómek alýshylar qabyldandy	1180	1267	1186
Onyń ishinde er adamdar	1046	1105	982
Onyń ishinde áıel adamdar	134	162	204
Qujaty barlar	140	108	90
Múgedektik belgileýge kómek kórsetildi	14	8	17
«Sharapat» ortalyǵyna ornalastyryldy:	33	17	21

Kezbeler ishinde shetel zamattary da bar

2025 jyldyń 1 qańtarynan 31 naýryzǵa deıin «Demeý» áleýmettik beıimdeý ortalyǵynyń kúndizgi bólimine 389 adam qabyldandy. Onyń 60-y – áıel adam, 329-y – er adam.

Sondaı-aq osy aralyqta túngi qoný bólimine 874 adam qabyldandy. Onyń 619-y – astanalyq, 86-sy – Aqmola oblysynyń adamdary, 160-y – basqa óńirlerden kelgen, 4-eýi – ózge eldiń azamattary.

Odan bólek, 1 qańtardan 31 naýryzǵa deıin áleýmettik patrýldeýdiń mobıldik qyzmeti 447 ret shaqyrylyp, ortalyqqa 625 adam jetkizilgen. Onyń 76-sy kúndizgi bólimge, 545-i túngi qoný bólimine qabyldandy.

Kúndizgi jáne túngi bólim qalaı jumys isteıdi?

Kúndizgi bólimge túsken adamdarmen kelisimshart jasalady jáne olardyń ómirlik qıyn jaǵdaıdan shyǵýyna kómek kórsetiledi. Atap aıtqanda qujattary jóndelip, tamaq beriledi, sondaı-aq jumysqa turýyna kómek kórsetiledi.

Túngi bólimge qabyldanǵan adam ortalyqta keshki 9-dan tańerteńgi 9-ǵa deıin bola alady, biraq olarǵa tamaq berilmeıdi. Tek qonatyn tósek-oryn beriledi. Kúndiz olar óz jumystarymen ketip, keshki ýaqytta orala alady.

Jumysqa tártip saqshylary da tartylady

Astana qalasy Polıtsııa departamenti jedel-profılaktıkalyq sharalardy júrgizip turady. Kún saıyn bizdiń qyzmetkerlermen birge tártip saqshylary PIK, MIB-terge baryp, túsindirý jumystaryn júrgizedi. Qıyn jaǵdaıǵa tap bolǵan jandar qandaı nomerlerge habarlasýyna bolatyny jóninde aqparattar taratylady. Bul jumystar azamattardyń qaýipsizdigi úshin jáne Astana kelbetiniń talaptaryna saı bolý úshin júrgiziledi.

«Demeý» ortalyǵynda qandaı áleýmettik qyzmetter kórsetiledi

Ortalyq dırektory Samat Topataevtyń aıtýynsha, munda 7 arnaıy áleýmettik qyzmet túri kórsetiledi:

1. Áleýmettik-turmystyq qyzmetter – qyzmet alýshylardy qabyldaý jáne ýaqytsha ornalastyrý, úsh mezgil tamaqpen qamtamasyz ete otyryp, tósek-oryn berý, tósek-jabdyqtarmen, jeke gıgıena quraldarymen jáne ish kıimmen qamtamasyz etý.

2. Áleýmettik-medıtsınalyq qyzmetter – dárigerge deıingi medıtsınalyq kómek kórsetý, qyzmet alýshylardy aýrýhanaǵa jatqyzýǵa jáne profılaktıkalyq tekserýden ótýge járdemdesý.

3. Áleýmettik-psıhologııalyq qyzmetter – qyzmet alýshylarmen psıhoprofılaktıkalyq jumys júrgizý, shuǵyl psıhologııalyq kómek kórsetý, áńgimelesý, tyńdaý jáne dem berip qoldaý.

4. Áleýmettik-quqyqtyq qyzmetter – zańdy mańyzy bar qujattardy resimdeýge kómek kórsetý, qyzmet alýshylarǵa áleýmettik-quqyqtyq máseleler boıynsha keńes berý.

5. Áleýmettik-ekonomıkalyq qyzmetter – tıisti járdemaqylar men tólemderdi alýǵa járdemdesý.

6. Áleýmettik-mádenı qyzmetter – merekelerdi, úıirme jumystaryn jáne bos ýaqytty ótkizý is-sharalaryn uıymdastyrý.

7. Áleýmettik-eńbek qyzmetter – qyzmet alýshylardyń eńbek daǵdylaryn anyqtaý boıynsha is-sharalar ótkizý, qoǵamdyq paıdaly jumystarǵa qatystyrý.

Qandaı adamdar bul qyzmetti ala almaıdy

Samat Topataevtyń aıtýynsha, úısiz-kúısiz jandardyń ýaqytsha panalaý uıymdarynda ornalasýyna myna medıtsınalyq kórsetkishter anyqtalǵan jaǵdaıda ruqsat berilmeıdi:

1. Minez-qulyq buzylystarymen qatar júretin psıhıkalyq aýrýlar, bul ózine de, aınalasyndaǵylarǵa da qaýip tóndiredi;

2. Týberkýlezdiń belsendi kezeńi, juqpaly aýrýlar, karantındik ınfektsııalar;

3. Alkogoldik nemese esirtkilik masań kúıde bolýy;

4. Aýrýdyń termınaldyq satysy, bul pallıatıvtik kómek pen meıirgerlik kútimdi qajet etedi;

5. Arnaıy medıtsınalyq uıymdarda statsıonarlyq emdeýdi qajet etetin basqa da aýrýlar nemese jaraqattar.

Atalǵan medıtsınalyq kórsetkishteri bar adamdar tıisti densaýlyq saqtaý uıymdaryna joldanady.

Aıta keteıik, Áleýmettik qyzmetter portaly múgedektigi bar jandarǵa qandaı qyzmetter kórsetetini habarlandy.