Talimger kýrsyn aıaqtaǵan 100 pedagog oqýshylardy kásipkerlikke baýlýǵa daıyn
AQTAÝ. KAZINFORM – Mańǵystaý oblysynda Talimger jobasynyń alǵashqy leginde kásipkerlik pen kásibı baǵdar berý kýrstarynan ótken 100 pedagogke sertıfıkattar tabystaldy.
Bul joba Tımýr Qulybaevtyń Halyk qaıyrymdylyq qory men Mańǵystaý oblysy ákimdiginiń qoldaýymen júzege asyp, mektep oqýshylary men stýdentterdiń jańa ekonomıkanyń talabyna saı zamanaýı daǵdylaryn damytýǵa baǵyttalǵan.
Kýrs barysynda ustazdar kásibı baǵdar berýdiń ádistemelerinen bastap, bıznes-jobalardy qurý jáne júzege asyrý qyrlaryn meńgerdi. Olar qarjy, tsıfr jáne medıasaýat boıynsha zamanaýı quraldarmen tanysyp, jańa oqý jylynan bastap óńirdiń mektepteri men kolledjderinde qoldanylatyn biregeı ádistemelik materıaldarǵa qol jetkizdi.
Mańǵystaý oblysy bilim basqarmasy basshysynyń orynbasary Quralaı Gazımova bul bastamany óńir úshin mańyzdy kezeń dep atap ótti.
— Pedagogterdiń yntasy men yqylasyn kórip otyrmyz. Olar alǵan bilimin oqýshylarǵa jetkizýge daıyn. Birlesken kúsh-jigerimiz arqyly jańa býyndy isker, shyǵarmashyl ári jaýapty azamat etip tárbıeleı alamyz, — dedi ol.
Joba bas jattyqtyrýshysy Ásemgúl Qadyrhannyń aıtýynsha, baǵdarlama tek oqýshylarǵa emes, eń aldymen pedagogterge baǵyttalǵan. Sebebi, ustazdar jas býynǵa tyń oılaý qabiletin, jaýapkershilik alýǵa daǵdylanýyn jáne jańa múmkindikterdi kórý qabiletin qalyptastyrady.
Kýrs túlekteri de óz áserlerin bólisti.
— Kýrs barysynda qanshama qyzyq ádistemelerdi úırendik. Endi sabaqtardy jańa formatta ótkizip, oqýshylardy naqty jobalarǵa tarta alamyn. Bul bastama bizge shabyt berdi, — Qaraqııa kásiptik kolledjiniń oqytýshysy Anar Toqbaeva.
Maǵan ásirese baǵdarlamanyń praktıkalyq bóligi — keıster, bıznes-oıyndar, pikirtalastar qatty unady. Bul bizge oqýshylardy ómirge naqty daıyndaýǵa senim beredi, — dedi Aqtaý qalasyndaǵy gımnazııanyń psıholog-proforıentology Erǵalı Gúljan.
— Talimger — jaı ǵana kýrs emes, tutas damý júıesi. «Halyk» qoryna jáne jobany qoldaǵandarǵa alǵys aıtamyn. Endi biz balalarǵa tek oqýlyqtan alynǵan bilimnen de artyq múmkindik bere alamyz, — Aqtaý qalasy № 19 mekteptiń kásiptik daıarlyq jónindegi orynbasary Aımgúl Janadılova.
Pedagogterdi oqytý jobanyń kelesi leginde jalǵasady. Al 2025 jylǵy qyrkúıekten bastap «Kásipkerlik jáne bıznes negizderi» páni Mańǵystaý oblysyndaǵy barlyq mektep men kolledjinde engiziledi.
Aıta keteıik, Talimger — Tımýr Qulybaev qorynyń óńirdi damytýǵa arnalǵan aýqymdy baǵdarlamasynyń bir bóligi. Bul bastama Memleket basshysy Qasym-Jomart Toqaevtyń halyqqa Joldaýynda aıtylǵan «Kásipkerlik negizderi mektepten bastap joǵary oqý oryndaryna deıin oqytylýy tıis» degen tapsyrmasymen úndesip jatyr. Qor qolǵa alǵan joba – qoǵam men memlekettiń tájirıbege negizdelgen bilimge degen suranysyna der kezinde berilgen jaýap.