Talıban jaqtastary Aýǵanstanda soǵysty toqtatýdyń talabyn aıtty

QABÝL. QazAqparat – Aýǵanstan bıligi men «Talıban» ókilderi arasynda kelissózder júrgizildi. Onda talıbanshylar Aýǵanstan túremelerindegi 7 myń jaqtasyn shyǵarǵan jaǵdaıda, atysty úsh aıǵa toqtatatynyn málimdedi, dep habarlaıdy QazAqparat tilshisi The National News-ke silteme jasap.

Bul usynys týraly beısenbi kúni aýǵan kelissózge qatysqan úkimetiniń ókili Nader Naderı habarlady.

«Bul – úlken talap», - dedi Naderı. Onyń aıtýynsha, oǵan qosa, kóterilisshiler Talıban kóshbasshysyn BUU-nyń qara tiziminen alys tastaýdy talap etken.

Bul kezde talıbter aýǵan provıntsııalaryna basqynshylyq jasap, negizgi marshrýttar boıyndaǵy qalalardy, sonymen qatar saýda úshin asa mańyzdy shekara ótkelderin basyp alýda. Jergilikti turǵyndardyń aıtýynsha, 13 shilde kúni olar Pákistanmen shekaradaǵy Spın-Boldak-Chaman shekara ótkelin basyp alǵan.

Degenmen beısenbi kúni Qabýldyń resmı ókilderi úkimet áskeriniń talıbter ýaqytsha jaýlap alǵan Spın-Boldak-Chamandy qaıtadan óz baqylaýyna alǵanyn málimdedi, dep habarlaıdy Reuters.

Qandaǵar óńiri ákimshiliginiń sheneýnigi Talıban jaýyngerleriniń bul aýdandaǵy aýǵan qaýipsizdigi kúshterinen asyp túsetinin eskertedi.

Bul oraıda, Talıbannyń resmı ókili Zabıhýlla Mýdjahıd aýǵan úkimeti taratqan shekara ótkelin qaıta óz baqylaýyna alǵany týraly aqparatty joqqa shyǵardy.

«Bul – Qabýl ákimshiliginiń nasıhaty men negizsiz málimdemesi», - dedi Talıban ókili. Onyń aıtýynsha, talıbandyq ásker áli kúnge deıin shekara ótkelin ustap tur.

Sol arada, BUU-nyń Bosqyndar isteri jónindegi Joǵary komıssar basqarmasy (BJKB) Aýǵanstanǵa kele jatqan gýmanıtarlyq daǵdarys týraly eskertti. Ol, óz kezeginde, bosqyndardyń jappaı kórshi elderge qashýyna ákelýi múmkin.

Qazirgi kezde dıplomatııalyq kúshter Qatarda ótip jatqan kelissózderde aýǵan bıligi men Talıbandy atysty toqtatýǵa ıtermeleýge jumyldyrylǵan. Búgin Aýǵanstannyń prezıdenti Ashraf Ganı Tashkentte ótip jatqan «Orta azııa elderi – AQSh» S5+1 formatyndaǵy kezdesýde óńirlik kóshbasshylarmen kezdespek.

Eske salsaq, Aýǵanstandaǵy jaǵdaı kúrdelenip Aýǵanstannyń qarýly áskerıleri Ózbekstan men Tájikstan aýmaǵyna ótip ketken edi. «Talıban» qozǵalysy Aýǵanstandaǵy kóptegen jerlerdi basyp aldy. Sondaı-aq, Tájikstan Aýǵanstanmen shekarany nyǵaıtý úshin 20 myń sarbazdy áskerge shaqyrmaq. Jáne tálipterden qashqan bir top aýǵanstandyq Tájikstan shekarasynan ótip ketti.