Talǵat Rahmanberdi Astananyń Baıqońyr aýdanyna ákim boldy

Prezıdent Ákimshiliginiń jáne qala máslıhaty depýtattarynyń kelisimi boıynsha Astananyń Baıqońyr aýdanyna jańa ákim taǵaıyndaldy. Bul laýazymǵa Talǵat Rahmanberdi keldi, dep habarlaıdy Kazinform.

Elorda ákimdiginen málim etkendeı, T.Rahmanberdi eńbek jolyn 2004 jyly «Jambyl oblysynyń stýdentter men jastar odaǵy» jastar qoǵamdyq birlestiginde bastaǵan (Taraz qalasy).

Ár jyldary «Astana qalasynyń stýdenttik qurylys jáne jastar eńbek jasaqtarynyń shtaby» qoǵamdyq birlestigin basqardy, QR Bas prokýratýra ınstıtýtynyń (Astana qalasy) qylmystyq protsestiń jáne jedel-izdestirý qyzmetiniń zańdylyǵyn qadaǵalaý boıynsha biliktilikti arttyrý bóliminde aǵa prokýror, «Astana qalasynyń jastar saıasaty máseleleri basqarmasy» MM basshysy jáne taǵy basqa qyzmetterdi atqardy.

2016 jyldyń sáýirinen 2019 jylǵy naýryzǵa deıin Astana qalasy Saryarqa aýdany ákiminiń orynbasary, 2019 jylǵy sáýirden «Astana qalasy ákiminiń apparaty» MM basshysynyń orynbasary bolyp jumys istedi.

Sońǵy jyldary «Astana qalasynyń qoǵamdyq damý basqarmasy» MM, «Astana qalasynyń Іshki saıasat basqarmasy» MM basshysy, qala ákiminiń keńesshisi laýazymdaryn atqardy.

Memleket basshysynyń tapsyrmalary aıasynda Astana ákimi Jeńis Qasymbek aýdan men eldi mekenderdi damytý boıynsha birqatar mindet júktedi.