Talǵarlyq dárigerler naýqasqa ÝDZ-ny aýrýhananyń dálizinde jasaǵan
QONAEV. KAZINFORM – Talǵar aýrýhanasynda naýqasqa ÝDZ (ýltradybystyq zertteý) aýrýhananyń dálizinde jasalyp jatqan vıdeo áleýmettik jelige shyqty.
«Almaty oblysyndaǵy qatal Talǵar aýrýhanasynda tipti ÝDZ-ny dálizde jasaıdy eken. Qurmetti Ajar Ǵınııat, sizge ótinish, medıtsınamen aınalysyńyzshy. Hırýrgtar operatsııany dalada jasap, aıdy aspanǵa bir-aq shyǵarmasyn», - delinedi vıdeodaǵy jazbada.
Posmotret etý pýblıkatsııý v Instagram
Atalǵan vıdeoǵa qatysty Talǵar aýdandyq ortalyq aýrýhanasy Kazinform tilshisine túsinik berdi. Aýrýhananyń málimetinshe, aýrýhananyń qabyldaý bólimderi kenetten qatty aýyryp qalǵanda jáne ómirine qaýip tóngen jaǵdaıda naýqastardyń jıi keletin shuǵyl kómek kórsetý orny bolyp tabylady.
«Mundaı jaǵdaıda ýaqyt mınýtpen esepteledi. Naýqastyń densaýlyǵynyń odan ári nasharlaýyn boldyrmaý úshin birden sol jerde kómek kórsetiledi. Ol úshin qabyldaý bólimderi jyljymaly mobıldi medıtsınalyq qurylǵylarmen jabdyqtalǵan. Bul ýaqytta naýqastyń jaǵdaıyn eskere otyryp, onyń nasharlaýyn boldyrmaý jáne naýqasty ary qaraı jóneltetin jerdi anyqtaý maqsatynda zertteý birden sol jerde jasaldy. Vıdeoda ÝDZ apparaty mobıldi ekendigi jáne kabınetten sol maqsatta shyǵarylǵanyn anyq kórýge bolady. Basqa barlyq jaǵdaıda ÝDZ jeke kabınetterde jasalady», - dep habarlady aýrýhananyń baspasóz qyzmeti.
Aýrýhanada sondaı-aq adamdardy sabyrly bolýǵa jáne mundaı jaǵdaıǵa túsinistikpen qaraýǵa shaqyrdy, sebebi, onda adamnyń ómiri basty orynda turady.
