Talǵardaǵy pılottyq joba respýblıka boıynsha engizilýi múmkin

ASTANA. KAZINFORM — Almaty oblysy Talǵar aýdanynyń mektepteri men kolledjderinde 7-8 synyp oqýshylary arasyndaǵy býllıng, kıberbýllıng jáne ózge de zorlyq-zombylyq túrleri 18%-ǵa tómendedi. Bul týraly Oqý-aǵartý mınıstrliginiń baspasóz qyzmeti habarlady. 

Almaty oblysy Talǵar aýdanynyń mektepteri men kolledjderinde «Zań men tártip» pılottyq jobasy aıasynda bilim alýshylar arasyndaǵy táýekel faktorlarynyń azaıǵany tirkeldi.

Aralyq monıtorıng qorytyndysy oń dınamıka kórsetti. Jobanyń tıimdiligin eskere otyryp, ony búkil respýblıka boıynsha keńinen engizý josparlanyp otyr.

Máselen, 7-8 synyp oqýshylary arasyndaǵy býllıng, kıberbýllıng jáne ózge de zorlyq-zombylyq túrleri 18%-ǵa tómendedi.

Sonymen qatar psıhologııalyq jaǵdaıy turaqty jasóspirimderdiń sany artty. 7-8 synyptarda táýekel deńgeıi tómen oqýshylar úlesi 31,9%-ǵa ósti, osyndaı oń úrdis 9-10 synyp oqýshylary men kolledj stýdentteri arasynda da baıqalady.

Mamandardyń erekshe nazaryn qajet etetin jasóspirimder sany qysqardy. 7-8 synyp oqýshylary arasynda atalǵan toptaǵy balalary sany 30%-dan astamǵa azaıdy. Jalpy alǵanda, bilim alýshylar óz minez-qulqyna jaýapkershilikpen qarap, áreketteriniń quqyqtyq saldaryn tereńirek túsine bastady.

Atalǵan bastama Talǵar aýdanyndaǵy 10 mektep pen 3 kolledjdiń 9 myńǵa jýyq bilim alýshysyn qamtıdy. Munda quqyq qorǵaý organdarynda qyzmet tájirıbesi bar tálimgerler eki aptada bir ret profılaktıkalyq sabaqtar ótkizip turady.

Qol jetkizilgen nátıjeler jobanyń tıimdiligin dáleldedi. «Qazaqstan balalary» tujyrymdamasy aıasynda «Zań men tártip» jobasyn respýblıka boıynsha keńinen engizý kózdelgen. Bul quqyq buzýshylyqtyń aldyn alý, zorlyq-zombylyqqa jol bermeý jáne balalar úshin qaýipsiz orta qalyptastyrýdyń biryńǵaı tásilderin júıeleýge múmkindik bermek.

Aıta ketelik Jambyl oblysynda oqýshylar býllıngine qatysy bar úsh ata-anaǵa aıyppul salynǵan edi.