Talǵardaǵy kisi óltirý men bala urlaý isi: sot jabyq rejımde ótedi

QONAEV. KAZINFORM — Almaty oblysynyń Qyzylqaırat aýylynda adam óltirý jáne kámeletke tolmaǵan qyzdy urlaý isi boıynsha aldyn ala sot otyrysy Qaskeleń qalasynda bastaldy.

Otyrys Almaty oblysynyń qylmystyq ister jónindegi mamandandyrylǵan aýdandyq sotynda ótip jatyr. Sot protsessinde tóraǵalyq etýshi sýdıa bolyp Asqarbek Beıimbetov taǵaıyndaldy.

Aldyn ala tyńdaý barysynda aıyptalýshylardyń advokattary isti jabyq rejımde qaraýdy talap etti. Al jábirlenýshi tarap kerisinshe protsesti ashyq ótkizýdi surady.

Taraptardyń ýájderin tyńdaǵan sýdıa otyrystyń jabyq rejımde ótetinin habarlady. Sebebi is materıaldarynda 120-baptyń 1-bóligi (zorlaý) jáne 147-baptyń 5-bóligi (jeke ómirge qol suǵylmaýshylyqty jáne QR-nyń onlaın-platformalardaǵy derbes derekter týraly zańnamasyn buzý) boıynsha aıyptaýlar qaralady.

Aıyptalýshylar oryndyǵynda úsh adam otyr, olardyń ekeýi — kámeletke tolmaǵandar. Negizgi kúdikti Elaman Aıǵazınovqa kisi óltirý, zorlaý, adam urlaý jáne qarý saqtaý sııaqty 12 bap boıynsha aıyp taǵylyp otyr. Al eki kámeletke tolmaǵan jasóspirimge «Adamdy top bolyp óltirý» jáne «Kámeletke tolmaǵandy qatystyrý arqyly adam urlaý» baptary boıynsha aıyp taǵylǵan.

Eske salaıyq, Talǵarda 2025 jylǵy 6 qyrkúıekte jantúrshigerlik qylmys boldy: beıtanys adam er kisini atyp, kishkentaı qyzdy alyp qashyp ketken edi. 

Tergeý málimetinshe, kúdikti men kishkentaı qyzdyń anasy buryn jaqyn qarym-qatynasta bolǵan. Aralarynda janjal shyǵyp, er adam áıeldiń aǵasyn myltyqpen atyp tastaǵan. Ol alǵan jaraqatynan sol jerde kóz jumǵan.

Keıin polıtsııanyń arnaıy jasaǵy qyzdy bosatyp, kúdiktini ustady. 

Artynsha jaraqat alǵan kishkentaı qyzǵa ota jasaldy. 

Bul oqıǵa boıynsha polıtsııa qyzmetkerleriniń áreketsizdigine baılanysty is qozǵaldy. 

Al 2025 jylǵy 13 qazanda kisi óltirý men bala urlaý isi boıynsha tergeý aıaqtalǵany belgili boldy. 

2025 jylǵy 17 qarashada is sotqa joldandy.