Talǵardaǵy qandy oqıǵa: kisi óltirý men bala urlaýǵa qatysty is sotqa joldandy

QONAEV. KAZINFORM – Almaty oblysy Talǵar aýdany Qyzylqaırat aýylynda er adamdy atyp óltirý jáne kámeletke tolmaǵan qyzdy urlaý deregi boıynsha qozǵalǵan qylmystyq is sotqa joldandy.

Bul týraly Kazinform tilshisine jábirlenýshi taraptyń advokaty Jandos Palmanov aıtty.

– Qylmystyq is Qylmystyq-protsestik kodekstiń 305-baby tártibi boıynsha aıyptaý aktisimen birge Almaty oblysynyń prokýratýrasynan Almaty oblysynyń qylmystyq ister jónindegi mamandandyrylǵan aýdanaralyq sotyna joldandy. Sot Qaskeleń qalasynda ornalasqan, - dedi advokat.

Іs boıynsha úsh kúdikti bar, olardyń ekeýi – kámeletke tolmaǵandar. Negizgi kúdiktige 12 bap boıynsha aıyp taǵylǵan: onyń ishinde «adam óltirý», «zorlaý», «adam urlaý», «qarýdy zańsyz saqtaý» jáne basqa da aýyr qylmystar bar. Al kámeletke tolmaǵan eki jasóspirimge «adamdar toby bolyp kisi óltirý» jáne «kámeletke tolmaǵandy qatystyrý arqyly adam urlaý» baptary boıynsha aıyp taǵylyp otyr.

Eske salaıyq, Talǵarda 2025 jylǵy 6 qyrkúıekte jantúrshigerlik qylmys boldy: beıtanys adam er kisini atyp, kishkentaı qyzdy alyp qashyp ketken edi.

Tergeý málimetinshe, kúdikti men kishkentaı qyzdyń anasy buryn jaqyn qarym-qatynasta bolǵan. Aralarynda janjal shyǵyp, er adam áıeldiń aǵasyn myltyqpen atyp tastaǵan. Ol alǵan jaraqatynan sol jerde kóz jumǵan.

Keıin polıtsııanyń arnaıy jasaǵy qyzdy bosatyp, kúdiktini ustady.

Artynsha jaraqat alǵan kishkentaı qyzǵa ota jasaldy.

Bul oqıǵa boıynsha polıtsııa qyzmetkerleriniń áreketsizdigine baılanysty is qozǵaldy.

Keıinirek Talǵar aýdany polıtsııa basqarmasynyń bir qyzmetkeriniń salǵyrttyǵyna qatysty qylmystyq isti tergeý aıaqtalǵany habarlandy.

Al 2025 jylǵy 13 qazanda kisi óltirý men bala urlaý isi boıynsha tergeý aıaqtalǵany belgili boldy.