Talǵarda bopsalaýmen aınalysqan qylmystyq top ustaldy

QONAEV. KAZINFORM – Almaty oblysy Polıtsııa departamentiniń Uıymdasqan qylmysqa qarsy kúres basqarmasy Talǵar aýdanynda bopsalaýmen jáne tonaýmen aınalysqan qylmystyq topty ustady.

Polıtsııanyń málimetinshe, qylmystyq shemanyń uıymdastyrýshysy – Qaınazar aýylynyń 19 jastaǵy turǵyny. Ol óz sybaılastarymen birge qurbandardy áleýmettik jeliler arqyly izdegen.

- Qylmystyq toptyń quramyndaǵy 17 jastaǵy qyz qurbandarymen tanysyp, kezdesýge usynys jasaǵan. Kezdesý kezinde ol ózin erkin ustap, jigittiń senimine kirgen. Alaıda biraz ýaqyttan keıin kenetten «aǵalarymyz» dep tanystyrǵan bir top jas jigit kelip, jábirlenýshini bopsalaıtyn bolǵan. Olar jynystyq qatynasqa baılanysty jalǵan aıyp taǵyp, aqsha talap etken. Qajet bolǵan jaǵdaıda kúsh qoldanyp, baǵaly zattardy, qujattardy tartyp alyp, iri kólemde aqsha aýdarýǵa májbúrlegen, - dep habarlady departamentten.

Oblystyq polıtsııa málimetine sáıkes, 2025 jyldyń 6 aqpanynda qylmystyq toptyń qurbany 24 jastaǵy Almaty qalasynyń turǵyny bolǵan. Ony top músheleri kúshpen ustap, jeke qujattary men kóligin tartyp alǵan, sondaı-aq 100 000 teńge aýdarýdy talap etken. Keıin qaskóıler odan taǵy 1 400 000 teńge talap etip, qorqyta bastaǵan.

– Jedel-izdestirý sharalarynyń nátıjesinde UQQKB qyzmetkerleri toptyń barlyq múshelerin ustady. Olardyń ústinen qorqytyp alý deregi boıynsha qylmystyq is qozǵaldy. Polıtsııaǵa jeti adam jetkizildi, olardyń tórteýi negizgi kúdikti retinde ýaqytsha ustaý ızolıatoryna qamaldy. Qazirgi ýaqytta qylmystyń barlyq mán-jaıy men basqa da zardap shekkenderdi anyqtaý boıynsha jumystar júrgizilip jatyr, – dep habarlady polıtsııadan.

Eske salaıyq, byltyr 4 qazanda Talǵar qalasyndaǵy tóbelesten 16 jastaǵy Sherzat Polat qaıtys bolǵanyn jazǵanbyz. 

16 jastaǵy Sherzat Polattyń óliminen keıin talǵarlyqtar «Hýtorskıe» toby týraly aıtqan edi.