Talǵarda ata-analardan aqsha jınaǵan mekteptiń dırektoryna qatań sógis berildi

TALDYQORǴAN. QazAqparat - Almaty oblysynyń Talǵar aýdandyq bilim bólimi mekteptegi synyptyń jóndeý jumysyna aqsha jınaǵan derekti tekserip, sol bilim mekemesiniń dırektory men synyp jetekshisine qatań sógis berdi, dep habarlaıdy QazAqparat tilshisi.

Aıta keteıik, 4 mamyr kúni áleýmettik jelide Talǵar aýdanyndaǵy Besaǵash aýylyndaǵy №29 mekteptiń 8 synyp ata-analarynyń aqsha jınaý faktisi boıynsha aýdıojazba jarııalandy.

Bul jerde bir oqýshynyń anasy ózge ata-analarǵa synyptyń jóndeý jumysyna 1 myń teńgeden aqsha ótkizýdi suraıdy.

Osyǵan baılanysty Talǵar aýdandyq bilim bólimi basshysynyń mindetin atqarýshy ata-analarmen kezdesti.

«Kezdesý barysynda jylda mekteptiń jóndeý jumysyna bıýdjetten aqsha bólinetini eskertilip aıtyldy. Máselen, qazirgi ýaqytta 33 mekteptiń ýaqytsha jóndeý jumystaryna 24 mln 800 myń teńge aqsha bólingen. Osyndaı jaıtqa jol bergeni úshin atalǵan mekteptiń dırektoryna qatań sógis berildi» delingen Almaty oblystyq bilim basqarmasynyń resmı habarlamasynda.

Vedomstvonyń aqparatyna sáıkes, synyp jetekshisine de sógis berilip, ol qyzmetinen shettetilgen.