Taldyqorǵanda búgin myńǵa jýyq aǵash otyrǵyzylyp, jarty tonna baýyrsaq taratyldy
«Naýryz – berekem, Naýryz – merekem» atty dýmandy sharalar bulaqtyń kózin ashý rásiminen bastaldy. Jalpyrespýblıkalyq «Taza tabıǵat» aktsııasy aıasynda mereke qonaqtary, aqsaqaldar men zııaly qaýym, «Jasyl el» shtabynyń ókilderi men qala belsendileri «Jeńis» saıabaǵyna myńǵa jýyq aǵash otyrǵyzdy. Aıta ketsek, bıyl oblysta 93 myńnan astam aǵash egiledi dep josparlanyp otyr.
«Jastar» saıabaǵyndaǵy «Naýryz aýylynda» qazaq halqynyń salt-dástúrleri kórinis taýyp, tusaý kesý rásimi, betashar t.b ǵuryptar kópshiliktiń nazaryna usynyldy.
Osy kúni saıabaqqa kelgen jetisýlyqtarǵa baýyrsaq, Naýryz kóje, palaý taratylyp, qaıyrymdylyq pen baýyrmaldyq pash etildi.
«Sheberler aýylynda» ulttyq qolóner buıymdarynyń kórmesi, «Dostyq aýylynda» etnomádenı ortalyqtardyń ulttyq taǵamdary men merekelik kontserti uıymdastyryldy.
Kásibı jáne áýesqoı sportshylar qol kúres, arqan tartys, toǵyzqumalaq, túıe palýan t.b. túrli ulttyq sport oıyndarynyń kórigin qyzdyrdy. Qazaqsha kúresten «Taldyqorǵan barysy» dodasy ótip, 1-oryndy ıelengen Rýslan Abdrazaqovqa 500 myń teńge, 2-oryn alǵan Janybek Dúısembaev 300 myń teńge jáne 3-orynǵa ıe bolǵan Eldar Muqanǵa 200 myń teńge júlde berildi.
Qaladaǵy meıramhanalar Naýryz alańynda qazaqtyń ulttyq taǵamdarynyń túr-túrin jasap, usyndy. Jastarǵa arnalǵan festıvaldar da merekeniń shyraıyn kirgizdi. Saıabaq sahnasynda oblystaǵy bı ujymdary halyqqa salt-dástúrge baılanysty túrli mýzykalyq-horeografııalyq bı kórinisterin qoıdy.
«Árqaısymyz aýlanyń ishi ǵana emes, syrty da, kóshe de, qala da, dala da ózimizdiki ekenin, oǵan óz úıimizge qaraǵandaı qamqorlyqpen, jaýapkershilikpen qaraý kerektigin aıqyn sezinýimiz qajet. Tazarý eń aldymen ishki dúnıemizden bastalady. «Aınalańdy ózgertemin deseń, birinshi óziń ózger» degen támsildiń máni osynda jatyr. Adamdy jańarýǵa, boıyn da, oıyn da, nıetin de taza ustaýǵa talpyndyrý – Naýryzdyń uly fılosofııasy. Merekeniń osy tereń taǵylymy búgingi jańa Qazaqstandy qurýdyń asyl murattarymen, aıqyn maqsattarymen astasyp jatyr.
Qashanda qaıyrymdylyqtyń úlken-kishisi bolmaıdy. Úlkenge qolqabys etý, kishige járdemshi bolý, bir-birine janashyrlyq jasaý, jannyń jylýyn, júrektiń meıirimin tanytý – jomarttyqtyń belgisi. Osyndaı izgi nıettegi árbir adamdy qoǵamdy alǵa súıreýshi, qozǵaýshy kúsh dep bilemiz. Bereke-birligimizdi eselep, qoǵam kútip otyrǵan jańa, ıgi ózgeristerge birge jeteıik. Naýryz ár shańyraqqa molshylyq pen qut ákelsin, qyzyr daryp, baq qonsyn! Otbasylaryńyzǵa amandyq, baqyt tileımin. Elimizdiń mereıi árdaıym ústem bolsyn», - dedi merekege jınalǵan qaýymdy quttyqtaǵan oblys ákimi Beıbit Isabaev.
Ulys merekesi Taldyqorǵannan bólek óńirdiń aýdan, qalalarynda da keńinen atalyp ótti. Máselen, Kóksý aýdanynda alaman báıge, kókpar, qazaqsha kúres sııaqty irgeli ulttyq oıyndar uıymdastyrylyp, bul dodalarǵa metsenattar 10 mln teńge báıge tikti. Sarqan qalasynyń ortalyq alańynda 200 metrlik dastarhan jaıylyp, kelinder arasynda baıqaýlar ótkiziledi. Jalpy, óńirdiń ár qıyrynda Naýryz kúni júzge jýyq aqshańqan kıiz úı tigildi.
Basty oqıǵa – B. Rımova atyndaǵy drama teatrynyń alańynda Uly Abaıdyń eskertkishi ashylyp, kópshilik Jetisý óńiriniń rýhanı ómirindegi erekshe jańalyqqa kýá boldy.
